Eit Kapittel om håp
FESTIVAL: Håp blir tema for neste års Kapittel-festival i Stavanger.
– Det er mørke tider. Så då tenkte de at …?
– … me måtte løfta blikket litt. Leita etter korleis me kan aktualisera tida me står i utan at det blir heilt mørkt. Dermed blei det «Håp».
Det er lenge til september og neste års Kapittel-festival. Men første måndag i advent gjorde altså festivalsjef Siri Odfjell Risdal det klart at tema for Stavangers tradisjonsrike festival for litteratur og ytringsfridom blir «Håp»:
– Forslaget om «Håp» kom inn tidleg. Eg har tenkt på om det kunne bli for svevande eller klisjéaktig. Men eg har kome til at det er eit kraftfullt omgrep, med masse energi og mykje me kan bygga rundt det.
Ho har merka på reaksjonane at «Håp» er eit godt ord:
– Det er tydeleg at me har behov for å halda fast i håpet for tida.
Håp gir motstand
Håp er til dømes ein føresetnad for motstand:
– Det ukrainske folkets motstand mot den russiske invasjonen baserer seg på håp. Det same gjer gateprotestane i Iran. Og klimakampen.
Odfjell Risdal ser mykje spennande å ta tak i litteraert også:
– Litteraturen er full både av håpefulle og håplause karakterar. Og så krev håpet evna til å førestilla oss noko anna enn det som er verkeleg rundt oss. Det er i seg sjølv spennande.
– Kor førande er temaet for festivalen for programpostane du skal få på plass framover?
– Temaet er berre eit omdreiingspunkt. Men det tvingar oss til å tenkja litt utanfor allfarveg. Det er ein måte å aktualisera programmet og festivalen, forhalda oss til det som skjer rundt oss. Det er eit fint startpunkt, men inga tvangstrøye. Det gjeld å finna eit ord som kan ta oss i litt ulike retningar.
Håpets filosofi
Det er litt tidleg å melda gjester. Men éin er allereie på plass: Det viser seg at filosof og forfattar Lars Fr. H. Svendsen allereie jobbar med ei bok om håpets filosofi, nettopp med utgangspunkt i situasjonen i Ukraina.
– Svendsen har sagt ja til å koma. Og så jobbar me med fleire andre namn.
Etter fleire år med korona, smitteverntiltak og styr, set Odfjell Risdal stor pris på å kunna konsentrera seg om innhaldet i festivalen. Haustens festival var den første sidan ho blei sjef som blei gjennomført utan restriksjonar.
– Det var kjekt å sjå godt trykk på billettsalet og at me kunne gjera kjekke ting som ikkje gjekk an under koronaen. Me har lyst til å laga større produksjonar og kjekke ting også til neste år. Som til dømes fotballkamp. Det var moro. Og så er det jo mykje håp i idrett.