Over 100.000 skal ha signert protest mot Equinor-prosjekt
LONDON: Equinor vil bygga ut olje- og gassfeltet Rosebank på britisk sokkel. Klimaaktivistar mobiliserer for å stoppa prosjektet.
130 kilometer utanfor Shetland ønsker Equinor å utvikla eit nytt olje- og gassfelt. Prosjektet har namnet Rosebank.
Greenpeace UK oppfordrar folk til å be statsminister Rishi Sunak om å stoppa Rosebank. I skrivande stund har 105.000 signert aksjonen, ifølgje nettsida deira.
Greenpeace er ein av organisasjonane som støttar kampanjen #StopRosebank, der blant anna Extinction Rebellion, Friends of the Earth og Fridays for Future også er med.
– Inkludert i netto null
Tysdag kunne ein sjå Stop Rosebank-banner gater i Oslo. Då demonstrerte klimaaktivistar i samband med Equinor sin haustkonferanse.
Equinor hevdar Rosebank kan bidra til å styrka energitryggleiken i Storbritannia og støtta landet sitt mål om å nå netto null klimagassutslepp.
I fjor la det internasjonale energibyrået (IEA) fram ein rapport som viser korleis den globale energisektoren kan nå netto null innan 2050. I dette scenarioet trengst det ingen fleire nye olje- og gassfelt enn dei som allereie hadde fått løyve i 2021.
– Korleis kan det å vinna ut meir fossil energi bidra til at Storbritannia når netto null?
– Rosebank blei funne i 2004 og er inkluderte både i det britiske netto null-scenarioet og i vår eigen netto null-ambisjon. Ingen scenario seier at det ikkje er behov for olje og gass i 2050. Men på Rosebank kan det bli produsert med mindre karbonavtrykk enn dersom dei måtte ha importert. Prosjektet er designa for lågast mogleg utslepp, seier Ola Morten Aanestad, pressetalsperson i Equinor.
Greenpeace hevdar at klimaavtrykket til Rosebank vil vera katastrofalt, og at det ikkje vil bidra til energitryggleik.
– Nei, det blir ikkje eit katastrofalt klimaavtrykk. Me har ein absolutt ambisjon om å minimera fotavtrykket på produksjonen. Miljøorganisasjonane reknar også med utsleppa ved forbruk av olja, og det gjeld jo alle felt. Forbruket blir ikkje lågare av at felt i Vesten ikkje blir realiserte, hevdar Aanestad.
Investerer i fornybart
Når det gjeld energitryggleiken, viser Aanestad til at Storbritannia i dag bruker meir olje enn dei sjølve produserer.
– Britisk sokkel har hatt ein ganske stor nedgang. Rosebank vil bidra til å motverka fallet, seier han.
Dei som støttar Stop Rosebank-kampanjen meiner at investeringane heller burde gå til fornybar energi.
– Me investerer veldig tungt i fornybar energi i Storbritannia. Spesielt på havvind er me verkeleg store. For tida er investeringane våre i fornybart heilt klart større enn dei fossile investeringane i landet, seier Aanestad.
Saman med partnarane planandre legg Equinor å ta ei investeringsavgjerd om Rosebank neste år.
– Middels stort
«Det største feltet fortener den største kampen» (journ.omsetting), skriv Greenpeace UK, og kallar Rosebank for det største uutvikla feltet i Nordsjøen.
– Det finst større uutvikla felt i vår del av Nordsjøen, men Rosebank er nok blant dei største på britisk sokkel, seier Aanestad.
I Equinor sine auge er Rosebank eit middels stort felt.
– Med 300 millionar fat er det berre ein brøkdel av Johan Sverdrup, og mykje mindre enn felt me har utbyggingsplanar om, seier Aanestad.
Rosebank-kampanjen er ei vidareføring av kampanjen Stop Cambo, eit felt på britisk sokkel som Equinor ikkje er involvert i. Desse aksjonistane ønsker no å kjempa mot alle nye oljefelt i Storbritannia.
– Me har full respekt for at det er ulike syn på energipolitikk. Og så er det opp til demokratisk valte organ å bestemma, seier Aanestad.
Under det internasjonale klimatoppmøtet møtte Equinor også kritikk. Her lanserte miljøogansiasjonar frå Norge, Storbritannia, Canada, Brasil og Argentina ein felles allianse med namnet «Equinor Out of Oil and Gas Alliance», melde E24.
Nei, det blir ikkje eit katastrofalt klimaavtrykk. Me har ein absolutt ambisjon om å minimera fotavtrykket på produksjonen.
Ola Morten Aanestad, Equinor