– Slutta i trygg jobb for å skriva patent
OLJÅ: Oljebransjen jaktar billegare måtar å plugga oljebrønnar på. Ein jaersk gründer trur han har funne ei løysing, godt hjelpt av ei fransk oljekjempe.
Jaersk gründer vil plugga oljebrønnar:
– Eg tok sjansen på å slutta i ein trygg jobb for å skriva patent, seier Gert Rege.
Jaerbuen er leiar av Wellstrøm, eit lite oppstartsselskap som har eigarane Aarbakke Innovation og britiske Rawwater Wells i ryggen.
Wellstrøm har utvikla ein teknologi for plugging av oljebrønnar. I dag er det vanleg å plugga med sement. Løysinga til Wellstrøm gjer nytte av eit metall som heiter bismuth. Metallet blir varma opp til det blir flytande som vatn og trengjer inn i krikar og kroker før det stivnar.
Framtidig milliardrekning for staten
– Sement er ei veldig dyr løysing, seier Harald Linga i Sintef.
Han er leiar for forskingssenteret SWIPA, eit samarbeid mellom fleire forskingsinstitusjonar og selskap i oljenaeringa.
– Me håper at me kan utvikla nye material til plugging som gjer at me kan få ned kostnadane med 50 prosent.
Då handlar det slett ikkje om småpengar, verken for oljeselskapa eller for staten.
– Det er opp mot 3000 brønnar som skal pluggast på norsk sokkel fram mot 2050. Får me ikkje ned kostnadane vil dette kosta 800 milliardar kroner i 2020kroner. Av dette skal staten betala 78 prosent, seier Linga.
Teknologien til Wellstrøm er ein av fleire han er kjent med at er under utvikling.
Med Wellstrøm si løysing skal ein kunna klara å plugga utan rigg og sement, og slik kan ei ifølgje Rege spara både tid, pengar og klimagassutslepp.
– Løysinga er godkjent som gasstett i 3000 år av Bureau Veritas. I vår bransje blir det rekna som for evig, seier han.
Stor samarbeidspartnar
Nyleg testa Wellstrøm teknologien på Ullrigg på Ullandhaug, ein test som det kosta rundt 5,8 millionar kroner å gjennomføra.
– Eg grugledde meg til testen fordi ein alltid kan få utfordringar når det er fyrste gong. Men me fekk ingen problem, seier Rege.
Wellstrøm samarbeider med Total Energies, som har over 8000 oljebrønnar på verdsbasis.
– Grovt sett er me no klare til å ta det i bruk i ein av brønnane våre, men me må få inn all dataa og evaluera for å sjå om det er noko me må justera, Ole Gabriel Johan Kverneland i Total Energies.
Hundrevis av brønnar
Neste steg ein industriell pilot i ein av brønnane til Total Energies i Nordsjøen. Kverneland understrekar at dei i piloten vil supplera med sement.
– Me er ikkje der endå at me kan stola hundre prosent på teknologien. Det er viktig å ta dette stegvis før me kan seia at det er eit fullverdig kommersielt produkt. Men testen på Ullandhaug var ein milepåle, seier han.
I løpet av dei neste ti åra skal Total Energies plugga 200 brønnar berre i Nordsjøen. Utanfor Nordsjøen har dei 1200 brønnar som skal pluggast i den same perioden.
– Viss dette går den vegen me ønsker, vil me bruka teknologien til Wellstrøm i alle brønnar der det er hensiktsmessig, seier Kverneland.
Rege fortel at teknologiutviklinga så langt har kosta rundt 30 millionar kroner. I tillegg til eigarane har også Forskingsrådet og Total Energies bidratt.
– Eg har brukt veldig mykje av mine eigne pengar på dette fordi det er noko eg verkeleg har trua på, seier Rege.