Ambisiøs Munch-film
FILM: Sånn har du ikkje sett Edvard Munch på film før. Og det fungerer!
Munch
Kinopremiere: 27.01.2023. Med: Anne Krigsvoll, Mattis Hermann Nyquist, Ola G. Furuseth, Alfred Ekker Strande, Jesper Christensen, Anders Baasmo, Dennis Storhøi, Nader Khademi, Arthur Berning, Ida Elise Broch, Lise Carlehed, Gine Cornelia Pedersen, Hildegunn Riise. Sjanger: Drama / Biografi / Norsk. Regi: Henrik M. Dahlsbakken. Manus: Henrik M. Dahlsbakken, Mattis Herman Nyquist, Fredrik Høyer, Gine Cornelia Pedersen og Eivind Saether. Nasjonalitet: Norge, 2023. Aldersgrense: 12 år. Lengde: 1 time, 44 minutt.
Kan ein kvinneleg skodespelar spela Norges mest berømte biletkunstnar gjennom tidene? Kan den unge Edvard Munch plasserast i Berlin i vår eiga tid, der han kjempar – og mislukkast – som kunstnar?
Ja. I Henrik Martin Dahlsbakken nye, ambisiøse film «Munch» kan han det.
«Munch» er ikkje ein klassisk, kronologisk biografisk film der ein fortel historia frå starten til slutten. Det er heller ikkje ein nesten like klassisk film der ein hoppar fram og tilbake i tid. «Munch» hoppar fram og tilbake i tid og vekslar mellom fire avgjerande periodar i målarens liv.
Men det er altså fire ulike forteljingar frå fire ulike punkt i målarens liv, forfatta av fire ulike manusforfattarar, i fire ulike filmspråk og med fire ulike skodespelarar i rolla som Edvard Munch. Alfred Ekker Strande spelar den 21 år gamle unge mannen som forelskar seg i ei gift kvinne ein sommar i Åsgårdstrand. Mattis Herman Nyquist spelar 30 år gamle Munch i kunstnarmiljøet i Berlin – men lagt til i dag. (Arthur Berning dukkar opp i rolla som Sigbjørn Obstfelder). Ola G. Furseth spelar 45 år gamle Munch på nervesanatorium i København, mens Anne Krigsvold altså spelar den 80 år gamle kunstnaren heime på Ekely i Oslo.
Til saman teiknar desse fire forteljingane eit portrett av kunstnaren Edvard Munch. Av eit kunstnarsinn. Her kunne eg brukt mange klisjeord om kunstnarsinnet som sensitivt, uroleg, einsamt, ambisiøst og komplisert. Men alt dette viser Dahlsbakken – på ein ikkje klisjéaktig måte. Her er rett og slett ein del interessante diskusjonar rundt både kunst og liv, med godt manus og godt skodespel. Det er også visuelt flott og kreativt gjort, der Munchs eigen kunst tidvis dukkar meir eller mindre diskret opp.
Munch var ein ambisiøs biletkunstnar. Dahlsbakken er ein ambisiøs filmkunstnar. Saman har dei laga ein ambisiøs kunstnarfilm vel verdt å sjå.