Sprintaren sett ut av bisarr skade – reiste heim i rullestol
FRIIDRETT: Då Mathias Hove Johansen førebudde seg på den siste treningsøkta på ein tre veker lang treningsleir, kjente han at ankelen stivna til. Det skulle vise seg å vere ein sjeldan leddsjukdom.
– I løpet av natta blei det verre og verre. Eg fekk ikkje sove og kunne ikkje gå, seier Mathias Hove Johansen.
Friidrettsutøvaren frå Stavanger var på ei tre veker lang treningsleir i Sør-Afrika då den bisarre skaden oppstod.
24-åringen hadde respondert bra på trening dei første vekene. Formen blei betre og betre. Den siste veka oppstod det ein mild matforgifting blant reisefølget på fem. Det var etter mageinfeksjonen at den sjeldne tilstanden oppstod.
Leddsjukdom
Diagnosen Hove Johansen fekk var reaktiv artritt. Ein leddsjukdom som gjev leddsmerter og stivheit.
– Det er ein immunrespons frå kroppen min. Etter eg hadde ein infeksjon i magen, har kroppen reagert med å angripe ankelen, forklarer han.
Då skaden forverra seg i løpet av natta og sprintaren ikkje fekk sove, starta han å søke på internett etter svar. Klokka 03.00 på natta fann han diagnosen som skulle vise seg å stemme.
Etter timar på sjukehus i SørAfrika starta reisa heim til Norge. Hove Johansen måtte ha rullestolassistanse på heimturen.
Forverra seg
Heime i Norge forverra situasjonen seg. Ifølgje Hove Johansen meinte legen det var moglegheit for blodpropp og verre ting, men det blei utelukka.
No har situasjonen roa seg kring ti dagar etter skaden oppstod. Friidrettsutøvaren har kasta krykkene og kan gå på ankelen. Men han veit framleis ikkje kor lenge han blir sett på sidelinja.
Førebels er trening ikkje aktuelt for karen som tok NMsølv på 200 meter i fjor, men han får behandling. Bilete av ankelen ser fine ut.
Usikre månadar
Kor tid han er tilbake på friidrettsbana, veit han ikkje. Beskjedane har vore ulike. Det kan ta alt frå to veker til eit halvt år. Progresjonen er ikkje nødvendigvis linaer, slik den ofte er med andre typar skader som til dømes ein strekkskade.
Hove Johansen, som deltok i EM i München i fjor, går nokre usikre månadar i møte. Men han er ved godt mot og er fast bestemt på å returnere til friidrettsbana sjølv om han innser at innandørssesongen truleg går utan han.
– Det er veldig blada kjensler. Eg føler ikkje eg kunne gjort noko annleis. Det er litt demotiverande. Så får eg sjå korleis det går framover og gjere alt eg kan mot neste år, seier han.
Det er ein immunrespons frå kroppen min. Etter eg hadde ein infeksjon i magen, har kroppen reagert med å angripe ankelen
Mathias Hove Johansen