Europa-sigersrekkja broten i ungarsk heksegryte
HÅNDBALL: Sola hang lenge med i Ungarn, men klarte ikkje å ta sin tiande strake gruppespelsiger i Europaligaen. Likevel har laget framleis gode sjansar for kvartfinalebillett.
– Eg er i grunn fornøgd med gjennomføringa. Det er litt tilfeldig det blei tap med fire mål og ikkje to, det hadde sett betre ut. Vi sleit i angrep då vi begynte å bli slitne, men jamt over var det ein fin bortekamp, seier trenar Steffen Stegavik.
I Ungarn hadde Sola sjansen til å sikre avansement til kvartfinalen i Europaligaen. Då måtte Debrecen bli slått på heimebane.
Slik blei det derimot ikkje.
Sjølv om Sola lenge hang godt med, var det heimelaget som avslutta best og tok sigeren 25–21.
– Gode sjansar
Éin ting var likevel godt nytt for Sola, for firemålstap gjer at gultrøyene er føre Debrecen på innbyrdes oppgjer då dei vann med fem mål på heimebane.
Med to kampar igjen av gruppespelet har Sola framleis alt i eigne hender. Dei to beste laga frå gruppa tar seg til kvartfinale, og etter laurdagens oppgjer står både Sola og Debrecen med seks poeng på topp av gruppa.
– Vi har gode sjansar for kvartfinale. Eg ser veldig positivt på det. Det er ekstra kjekt at det er så spanande. Vi kan avgjere det sjølv, seier Kristiane Knutsen.
Den rappe bakspelaren var blant Solas toppscorarar med fire mål. I Ungarn hadde ikkje Sola med sin mestscorande spelar i
Europa i år. Kristina Sirum Novak var igjen heime med sjukdom, noko laget fekk kjenne på.
– Sjølvsagt er det ganske stor forskjell med og utan ho. Ho bankar inn mål. Med høgrehendt høgreback mistar vi litt flyt og spelar annleis. Vi blir påverka av at ho ikkje var med, seier Knutsen.
Heksegryte
På tribunen i Ungarn var det stappfullt av heimefans som visste å halde lydnivået høgt med massive heiarop. Supporterane kunne minne om Vikings Felt O der dei stod og hoppa med skjerf, store banner og vaiande flagg.
Ungararane opna best i eit forrykande tempo og var i føringa innleiingsvis. Men Sola klarte å stabilisere avstanden og let ikkje vertane stikke frå.
Halvvegs var laga like langt på stillinga 13–13.
Tekniske feil
Laga følgde kvarandre tett også etter kvilen. Heimepublikummet blei meir og meir frustrerte, og peip kraftig på kvar dommaravgjersle som gjekk mot Debrecen.
Utover i omgangen sleit Sola i angrep, kasta vekk ballen og fekk tekniske feil mot seg. Det utnytta vertane som gjekk opp i ei firemålsleiing halvvegs i omgangen.
Sjølv om Sola klarte å naerme seg, stakk heimelaget ifrå på tampen. Då handla det meste om å avgrense tapet og halde avstanden under fem mål. Det klarte Sola, som måtte gje tapt 21–25.
To kampar står igjen for Sola i europaliga-gruppespelet: Kroatiske Podravka på bortebane og danske Nykøbing heime i Storhallen. Med minst éin siger er det framleis gode sjansar for avansement.