Straumnettet har ikkje plass til fabrikken: – Jobbar med alternative løysingar
SANDNES: Sandnesselskapet Horisont Energi vil bygga ammoniakkfabrikk i Finnmark. No melder Statnett at straumnettet er fullt.
Sandnes-selskapet Horisont Energi har store planar for fabrikkbygging i Hammerfest i Finnmark. Her vil dei produsera ammoniakk av naturgass i kombinasjon med karbonfangst og lagring. Ammoniakk blir brukt i industrien, og kan dessutan fungera som energiberar.
Horisont Energi har søkt om tilgang til 105 megawatt frå straumnettet for å driva fabrikken.
Ikkje ledig kapasitet
No har Statnett sagt nei, som fyrst omtalt i Teknisk Ukeblad. Det har dei gjort etter å ha analysert nettkapasiteten i nord. Dei har då kome fram til at det ikkje er ledig kapasitet til større forbruk før kapasiteten i og inn til området nord for Ofoten aukar, eller det kjem ny kraftproduksjon.
Bjørgulf Haukelidsaeter Eidesen, leiar av Horisont Energi, fortel at dei 105 megawattane er fordelte på tre trinn. Det er dei fyrste 35 megawattane det er viktigast for dei å få på plass.
– Me har jobba med alternative løysingar, og no vil me gå i dialog med Statnett. Får me ikkje straumen i tide, må me produsera han sjølve i eige anlegg ved hjelp av damp frå varmeproduksjonen. Det vil ha noko høgare kostnad, seier Eidesen.
Sjølv om det ikkje er kapasitet no, vurderer Statnett alle moglegheiter for å kunna tilby kapasiteten som Horisont
Energi, og fleire andre som har fått avslag, ønsker seg.
Statnett vil blant anna sjekka om kundar som tidlegare har fått reservert kapasitet, følgjer avtalt framdrift. Gjer dei ikkje det, vil Statnett ta frå dei plassen i køen og gje han vidare til andre. Dei jobbar også med å auka kapasiteten i straumnettet.
Nedgang på børs
Prosjektet heiter Barents Blue, og fram til førre veke var både Vår Energi og Equinor med på laget. Equinor meiner framleis det er eit godt prosjekt, men dei seier at dei no vel «å prioritera andre lågkarboninitiativ».
Equinor og Vår Energi er no erstatta av det spanske gjødsel- og ammoniakk-selskapet Fertiberia i Barents Blue.
E24 melde om kursnedgang for Horisont Energi etter at dette blei kjent. Den profilerte investoren Øystein Stray Spetalen var av dei som selde seg ned, og han trekte seg også frå styret.
– Dette må me ta til etterretning, og så må me jobba med marknaden for å bygga opp marknadsverdien igjen, seier Eidesen.
Selskapet jobbar også med karbonlagringsprosjektetErrai i Nordsjøen. Her ventar dei på svar på søknaden om lisens for å få ta i bruk eit reservoar til lagring.