– Ikkje bekymra
FRIIDRETT: Etter ein dryg månad plaga med sjukdom, er Jakob Ingebrigtsen i dag tilbake i konkurranse. Det blir første og siste løp før innandørs-EM i Istanbul i mars.
Ingebrigtsen spent på formen etter sjukdom:
– Kroppen kjennast bra. Eg har trent bra, men veit ikkje om det er nok. Det er det som er det store spørsmålet, seier Jakob Ingebrigtsen til Aftenbladet.
I går morges sette Lura-karen kursen mot franske Liévin for første konkurranse sidan han sprang inn til EM-gull i terrengløp i desember.
Sidan den gong har løpeesset slite med sjukdom. I fire-fem veker spelte ikkje kroppen på lag. Den einaste treninga han fekk gjort var å jogge. Stadige tilbakefall gjorde at han ikkje fekk trent normalt.
Ikkje bekymra
Han kan ikkje hugse sist han hadde eit like langt avbrekk frå trening. I fjor testa han positivt for korona like etter sølvmedaljen i innandørs-VM i Serbia. Då heldt han seg i ro i eit par veker.
– Eg er ikkje bekymra for utandørssesongen. No er det ganske lenge til konkurransar. Eg får gjort mykje trening om alt går etter planen framover. Men eg kan ikkje ha så mange avbrekk. Eg må halde meg sjukdomsfri og skadefri, viss ikkje kan det bli risikabelt, seier han.
Ingebrigtsen forklarer at han stadig tar forholdsreglar for å halde seg unna både skader og sjukdom.
– Av og til skjer det ting du ikkje kan gjere så mykje med, slik at begeret renn over med virus og sjukdom, fortel han.
Dobling i EM
Dei siste vekene har kroppen begynt å spele på lag igjen, og 22åringen har lagt ned konkurransespesifikk trening før løpet i Frankrike. Men han er framleis usikker på formen og forklarer at han tapte mykje av treninga som er grunnlaget for å skape form.
– Det er greitt med ein konkurranse før eg kjem til EM. Det er det som er målet – eit greitt løp og at ting fungerer bra. Så veit eg at eg ikkje har fått gjort noko av den treninga eg skulle gjort, seier han.
I fjor sette han verdsrekord under stemnet i Liévin. I år er målet å vinne løpet, noko han trur han «skal få til». Viss ikkje, blir han skuffa.
Løpet i Frankrike er første og siste test før innandørs-EM i Istanbul 2.–5. februar. Der planlegg friidrettsstjerna å doble, og stiller på både 1500 meter og 3000 meter.
Startskotet for 1500 meter i Liévin går 21.47 onsdag kveld. 22.35 skal Karsten Warholm i aksjon på 400 meter.
Det er greitt med ein konkurranse før eg kjem til EM. Det er det som er målet – eit greitt løp og at ting fungerer bra.
Jacob Ingebrigtsen