Ingen straffa etter at dyrevernarar tok seg inn på grisegardar
DYREVELFERD: 18 grisebønder i Rogaland fekk uønskt besøk av dyrevernarar. Begge partar melde kvarandre til politiet.
– Ingen er blitt straffa for dette i Sør-Vest politidistrikt. Dette kjem blant anna av at det ikkje har latt seg gjera å identifisera inntrengjarane, seier politiadvokat Øyvind Bore i miljøseksjonen i Sør-Vest politidistrikt.
I perioden 2015–2021 tok aktivistar frå Nettverk for dyrs frihet seg inn på over 60 norske grisegardar for å dokumentera forholda, her omtalt av NRK.
Bønder melde fleire av dei uønskte besøka til politiet, men som Bore her forklarer, blei ingen aktivistar straffa for dette i Rogaland.
Melde bønder til politiet
Også aktivistane gjekk til politiet. I 2021 politimelde dei 18 griseprodusentar i Rogaland. Meldingane var baserte på dokumentasjon frå dei uønskte besøka som aktivistane sjølve kalla for inspeksjonar.
Dei påståtte lovbrota gjeld blant anna manglande oppfølging av sjuke og skadde dyr, dårleg tilgang på vatn, dårleg reinhald, og dårleg tilgang på strø og rotemateriale. Brot på dyrevelferdslova kan bli straffa med gebyr og fengsel på inntil tre år.
Etter dette har politiet etterforska 23 saker fordelt på dei 18 bøndene.
– For at nokon av dyrehaldarane skal bli straffa, må det kunna bli bevist utover ein kvar rimeleg tvil at dei objektivt sett har eit dyrehald som avvik frå klart forsvarleg standard, og at dyrehaldar i det minste har vist grov aktløyse, seier Bore.
16 av sakene har politiet no lagt bort. Dei fleste av desse var saker der dei meinte det ikkje var mogleg å bevisa noko straffbart i retten. Men det var også tilfelle der det som blei meldt, ikkje var straffbart i utgangspunktet.
Politiet har fått klagar på seks av sakene som er lagde bort.
Heller ikkje gebyr
Politiet har sendt sju av sakene vidare til Mattilsynet, då dei har vurdert det slik at dei er under terskelen for fengselsstraff.
Mattilsynet kan gje gebyr ved brot på reglane for dyrevelferd. Men det har dei ikkje gjort i desse tilfella. Dei meiner andre formar for oppfølging tener dyrevelferda betre.
Dei sju sakene var knytte til seks gardar. Fire av dei seks gardane var også ein del av tilsynskampanjen som Mattilsynet gjennomførte i åra etter aksjonane til dyrevernarane. Tre av bøndene hadde då ingen regelbrot, ifølgje Mattilsynet. Den siste garden hadde fått ny eigar.
Nye meldingar til politiet
Mattilsynet har ikkje meldt nokon grisebønder til politiet etter tilsynskampanjen. Nettverk for dyrs frihet er ikkje einig i den vurderinga.
No har dyrevernarane meldt ti norske griseprodusentar til politiet basert på vedtak frå tilsynskampanjen til Mattilsynet. Seks av bøndene held til i Rogaland.