– Ingen er i naerleiken av dette
ISHOCKEY: Som første kvinneklubb i Norge har Oilers-damene fått eigne garderobar med ein prislapp på fleire millionar kroner. Det trur Oilers-trenaren kan vere med på å hente «bøtta» heim.
– Det betyr veldig mykje for oss. Det er ein stad vi kan samle oss og bygge laget. Eg syns vi fortener det, det må vi ha lov å seie, seier Christina Furseth.
20-åringen er kaptein på Oilers sitt kvinnelag og gjer seg klar til trening på is i den splitter nye garderoben.
No er det ikkje lenger berre herrane i Oilers som har eigne garderobar med tilhøyrande fasilitetar.
– Vi får ein mykje meir profesjonell kvardag. Vi har sjansen til å trene når vi vil. Alt ser meir profesjonelt ut rundt oss, som gjev oss ei kjensle av at vi er toppidrettsutøvarar, seier Furseth.
Tre millionar kroner
Førre veke opna dørene til det nye garderobeanlegget. Eigne plassar med namneskilt, plass til drakter og skeiser, privat oppbevaring og sminkespegel er noko av det kvinnene no har tatt i bruk.
Eige styrkerom følger også med. Med ein prislapp på kring tre millionar kroner har klubben tatt ytterlegare steg mot å profesjonalisere kvinnesatsinga.
I mai 2021 tok Stavanger Oilers grep for å styrke kvinnesatsinga i klubben. Då gjekk kvinnelaget frå å vere ein del av Stavanger Hockey, breiddesatsinga til klubben, til å bli tatt inn under Oilerssatsinga.
I går blei ein ny milepael oppnådd då garderobefløya opna.
– Det betyr mykje for damehockeyen. Igjen er Oilers først ute, så no må andre lag melde seg på. Eg trur det skapar betre trivsel, meir seriøsitet og at jentene blir sett på ein anna måte. Det er utruleg viktig at dei får noko eige, seier trenar Marcus Forgaard.
Tidlegare har kvinnene måtte pakke inn og ut av garderobar då kampar blei arrangert i arenaen. No slepp dei det stresset med ein permanent plass.
– Dette set preg ikkje berre her, men over heile Norge. Det seiast at dette er Europas finaste damegarderobe, og det skal du ikkje sjå vekk frå. Det er ingen kvinnelag som er i naerleiken av dette, seier Forgaard.
Meir konkurranse
Dei siste sesongane har Oilerskvinnene vore suverene i Norge. Laget toppar førebels tabellen i Bambusaligaen også i år, men har måtte sjå seg slått fleire gongar. I år er det åtte lag med i serien kontra seks i fjor.
Trenaren meiner det er bra med meir konkurranse og fortel at det er noko laget har sett fram til over lengre tid.
– Det trur eg skapar meir motivasjon for jentene. Dei veit dei kjem inn i kampar kor dei må slåst for å vinne, seier Forgaard som trekk fram tabelltoar Lillehammer som eit friskt pust i årets Bambusaliga.
Han får støtte frå kaptein Furseth.
– Det er positivt for kvinnehockeyen i Norge at det blir jamnare i toppen. For oss er det kjekt med konkurranse, seier 20-åringen.
Trenar Forgaard meiner den nye garderoben kan vere det som hevar prestasjonane til laget eit par prosent ekstra.
– Eg trur dette kan bidra til at vi greier å dra heim bøtta i år.
Ny milepael for Oilers-kvinnene: