Stjerne for ein dag
STAVANGER: Laurdag var det Ungdommens kulturmønstring i Sandnes og Stavanger. Me blei med både bak og framfor scenen på Metropolis i Stavanger.
– Har du ein plan B, trur du ikkje på plan A. Då skjer det ikkje noko.
– Du har ingen plan B?
– Eg har ingen plan B. Eg skal satsa på musikken.
Me er backstage på Metropolis – det kommunale kulturhuset for ungdom i Stavanger. Strengt tatt er me på medierommet, men akkurat nå, denne ettermiddagen, er det backstage. På bordet står det ei stor skål baconcrisp, eit fat med frukt, store flasker med Urge og Fanta med appelsinsmak.
Langs veggene sit ein gjeng ungdommar og ser ned i kvar sin mobilskjerm. Nei, forresten. Dei er ikkje ungdommar. I dag er dei artistar. For denne laurdagen er det Ungdommens kulturmønstring, UKM.
I grøn caps og litt for store bukser sit Sjur Grov-Hagen. Eller Joggedress, som han kallar seg når han rappar. Han skal snart på scenen. Og han har ingen plan B.
– Ambisjonen min er å leva av musikken. Ikkje bli kjempestor, men leva greitt, seier Joggedress.
Han laga sin første beat då han var åtte år. Første song på Spotify kom i 2020. Første album – «Alltid våken» – kom i fjor haust. Han har spelt litt på festivalar, vore med på Musikkfest. Nå skal han vera med på UKM.
– Eg føler dette er ein bra sjanse til å visa meg fram, seier han.
80 unge på scenen
Rundt 80 ungdommar er med på årets arrangement i Stavanger. Det er omtrent på nivå med åra før koronaen, seier kulturformidlar Christian F. Brynie på Metropolis.
Mange av dei unge håpefulle kjem frå kulturskulen, andre spelar i band på ungdomskulturhuset. Her er alle slags kulturuttrykk: Musikk, kunst, dans, drama.
– Juryen plukkar ut nokre som går vidare i konkurransen. Men mest av alt handlar UKM om å ha det moro, møta andre ungdommar som driv med kultur – og få oppleva meistringa som ligg i å opptre på ein proff scene, seier Brynie.
Straight outta Storhaug
Joggedress heiter altså til dagleg Sjur. Han er – enn så lenge – 15 år og går i tiande klasse på Naerbø ungdomsskule.
– Er det mykje å rappa om på Naerbø?
– Eg går berre på skule og er der i vekene. Men elles held eg meg på Storhaug.
– Er det mykje å rappa om på Storhaug, då?
– Eg er med i SOS-kollektivet –
Straight Outta Storhaug. Me driv vårt eige plateselskap, har ein produsent frå Grimstad, seier Sjur og peikar bort på ein kar i grå hettegenser i sofaen, og held fram:
– Og så har me eige studio rett her oppe. Eigentleg bruker me det mest til å henga ut. Men planen er å spela inn musikk.
Ambisjonen min er å leva av musikken. Ikkje bli kjempestor, men leva greitt.
Joggedress/ Sjur Grov-Hagen
Joggedress er ikkje den einaste rapparen som skal på scenen denne dagen. Før han leverer Tazani ein runde afro hip hop, mens Hj1 framfører ein rapp om laget sitt.
– Tusen takk til alle som kom, seier Hj1, lukkeleg når han er ferdig.
– Vaer så god, seier ein barnestemme i publikummet av håpefulle familiemedlemmer og kompisar.
Rett før Joggedress skal på, går 13- og 14-åringane Wragh frå Mariero på og leverer eit stykke sjølvkomponert tung rock med stort alvor.
Har Joggedress ein strategi nå når det snart er hans tur? Korleis skal han imponera på UKM?
– Eg har eit bra show. Eg skal imponera. Mange andre er betre enn meg på synging. Eg er best på rapping og har valt ut ein sårbar song folk kan kjenna seg igjen i.
– Kva skriv du om?
– Eg skriv om å vera kid på
Storhaug. Om damer. Pengar. Overtenking. Eg speglar meg sjølv.
Showtime!
Så er det Joggedress sin tur. Før han går på scenen, blir han intervjua backstage av to av dei unge programleiarane. Intervjuet blir strøyma inn på tv-skjermen i konsertlokalet.
Sjur fortel at han begynte med å laga konsertar med playmofigurar. Men så oppdaga han OnklP og fann ut at det gjekk an å rappa på norsk.
– Har du nokon du ser opp til, spør dei unge intervjuarane.
– Eg ser opp til far og mor. Og til alle som er høgare enn meg sjølv, svarer Joggedress, før lyset i salen bli dempa og det er showtime.
Han framfører songen «Alltid våken». Det er ein song om kjaerleikssorg. Han rører seg sjølvsikkert rundt på scenen. Det er bra med liv på første rad.
Så er det over. I gangen på veg tilbake til backstage får han ein diplom i hendene, det synlege provet på at han har vore med på UKM 2023, avdeling Stavanger. – Koss syns du det gjekk?
– Eg syns det gjekk bra, svarer Joggedress, før han blir omfamna fysisk og verbalt av den hettekledde produsenten frå Grimstad:
– Du killa.
Ny sjanse
Seinare på kvelden fell dommen. Publikumsprisen går til Wragh. Men så har fagpanelet valt ut fire utøvarar som går vidare til fylkesfinalen i Sandnes 21.–23. april. UTB jazz går vidare med låten «Goose BUMPS». Déja Vu Team Girly skal til Sandnes med sitt dansenummer. Baeko går vidare med kunstverka sine.
Men den siste utøvaren som skal til Sandnes for å prøva å nå heilt fram til landsfinalen i Trondheim i juni, heiter Sjur Grov-Hagen. Aka Joggedress.