Kroatisk motstand for Naerbø: – Eit lag eg veit ekstremt lite om
HANDBALL: MRK Sesvete er neste hinder i europacupen for Naerbø som jaktar eit nytt gull.
I går formiddag blei trekninga av kvartfinalane i europacupen gjennomført. Der unngjekk Naerbø den antatt sterkaste motstanden (serbiske Vojvodina).
Neste hinder for dei regjerande meistrane er MRK Sesvete frå Kroatia.
– Det er eit lag eg veit ekstremt lite om. Eg har sett litt på resultata, dei har gode resultat mot dei beste kroatiske laga. Sånn sett trur eg det er ein tøff motstandar. Kroatia har stolte handballtradisjonar, seier Naerbø-trenar Fredrik Ruud.
18. eller 19. mars blir den første kvartfinalen spelt. Naerbø startar med bortekamp i Kroatia.
Den avgjerande returkampen blir spelt i Sparebanken Vest Arena helga etter.
– Vi likar å starte på bortebane. Det er litt enklare å gå inn i kampar når ingen kjenner kvarandre. Normalt er det fordelaktig for oss, så vi må utnytte det, seier trenaren.
Berre kroatar
MRK Sesvete har berre kroatiske spelarar i stallen. Laget tok seg greitt vidare til kvartfinale etter 70–56 samanlagt mot italienske Sidea Group Junior Fasano. Kroatane spelar i ein spissa serie med dei seks beste laga i landet. Sesvete er eit bydistrikt i hovudstaden Zagreb.
Naerbø tok seg til kvartfinale på ein overbevisande måte med 70–58 samanlagt mot slovakiske MSK Povazska Bystrica i åttedelsfinalen.
Slik ser kvartfinalane ut: MRK Sesvete (Kroatia) – Naerbø
HCB Karvina (Tsjekkia) – Runar Sandefjord
Alingsås (Sverige) – HC Dukla Praha (Tsjekkia)
Vojvodina (Serbia) – RK Gorenje Velenje (Slovenia)
Kan bli norsk duell
Dersom Naerbø skulle gå sigrande ut av kvartfinalen, ventar vinnaren av oppgjeret mellom HCB Karvina og Runar Sandefjord i semifinalen.
– Alt her er vanskeleg. Vi tar det vi får, eg er fornøgd med at to norske lag unngår å møte kvarandre. Møtast vi i semifinale er vi garantert eit norsk lag i finalen. Før den tid ventar to vanskelege oppgjer. Alle laga er gode uansett, det handlar om kven som har dagen, seier Ruud.
Før laget sett kursen mot Kroatia, skal Naerbø spele fleire viktige oppgjer i eliteserien. Alt onsdag tar Naerbø i mot Drammen på heimebane. Blåtrøyene har aldri slått drammensarane, men trenar Ruud håpar onsdag blir dagen laget står for ein ny skalp.
– Drammen har eit kjempegodt lag og er favorittar. Vi er i ein god steam og skal byggje på det. At vi spelar på heimebane kan bli avgjerande. Det er ikkje urealistisk å ta poeng, alt er mogleg.