Ingen fuglar kolliderte
SKOTTLAND: Fuglane klarte å unngå havvindturbinane, konkluderer ein studie frå svenske Vattenfall. Birdlife Norge kallar funnet gledeleg, men ikkje utan atterhald.
Studie av havvind:
Norge er blant landa som vil bygga ut mykje havvind i åra som kjem. Kva dette vil ha å seia for fuglane, er det få, om nokon i det heile, som kan seia noko sikkert om.
– Veldig kapable
Svenske Vattenfall lanserte denne veka resultata av ein studie av fuglar og vindturbinar til havs. Dei følgde med på turbinane i Aberdeen Offshore Wind Farm i to år. Ingen fuglar kolliderte, om ein skal tru registreringane dei gjorde med radar og kamera.
Risikoen for at fuglar kolliderer med vindturbinar er ofte brukt som argument mot vindkraft, skriv Vattenfall i ei melding. Selskapet er sjølv med i fleire store havvindprosjekt.
Dei kallar si eiga undersøking for den mest omfattande og teknologisk avanserte som er blitt gjort.
– Folk har hevda at ein treng dyre løysingar for å hindra kollisjonar. Men artane me har observert, er gode til å unngå turbinblada. Dei verkar veldig kapable til å overleva i eit havvind-miljø, seier prosjektleiar Henrik Skov, som no ser behov for fleire studiar som kan kartlegga fleire artar og forhold.
Birdlife: – Gledeleg
Vattenfall observerte måker og suler, til saman fire artar.
– Det er spanande og gledeleg at artane ein har observert, ikkje kolliderte, seier Martin Eggen, naturvernrådgjevar i Birdlife Norge.
Men han kallar funna til Vattenfall for ei brikke i eit stort puslespel, og understrekar at ein må halda fram med undersøkingar. For konsekvensane vil variera alt etter art, stad, vêr og vind.
– At vindkraft utgjer ein kollisjonsfare for fuglar, er kjent og godt dokumentert. Potensielt er det fleire hundre ulike fugleartar som blir påverka av vindkraft, og eit fleirtal av dei trekker om natta. Millionar av trekkfuglar flyr over havet til og frå hekkeplassar i Norge. seier Eggen.
Vidare viser han til at det ikkje berre er kollisjon som er ein fare for fuglane. Nokon artar, som lom og lomvi, vel å unngå havvindanlegg. Då kan dei mista område der dei finn mat. Dette er saerleg aktuelt i kystnaere strøk og grunne havområde.