Trøbbel i boot camp
FILM: Velmeinande og viktig, men ikkje heilt vellukka om homofili i militaeret.
THE INSPECTION Kinopremiere: 24.03.2023. Med: Jeremy Pope, Gabrielle Union, Bokeem Woodbine, Raúl Castillo. Sjanger: Drama. Regi: Elegance Bratton. Nasjonalitet: USA, 2022. Aldersgrense: 12 år. Lengde: 1 time, 35 minutt.
Mang ein kunstnar har laga mang ein film eller skrive bok med utgangspunkt i eiga livshistorie. Mykje av det har blitt veldig bra. Å vera tett på stoffet, kjenna det innanfrå, kan vera ein stor fordel.
Samtidig kan det bli for naert. Så naert at det manglar litt nødvendig avstand.
Regissør Elegance Bratton har laga ein film om å prøva å koma gjennom boot camp for å bli amerikansk marinejeger. Det er ekstremt hardt. Og det blir langt verre for Ellis French, fint spela av Jeremy Pope, når det ganske raskt blir klart for dei andre på brakka at han er homofil. For i det machomilitaere miljøet skal ein ikkje vera homofil.
Brattons første langfilm følgjer Ellis frå livet som heimlaus, via mora som ikkje vil ha noko med sin homofile son å gjera, og gjennom boot camp. I tillegg til den harde treninga blir Ellis utsett for slag, spark, mobbing og utstøyting – men etter kvart også glimt av støtte.
Tematikken er i seg sjølv både interessant og viktig. Problemet for «The Inspection», er at det blir litt for mykje av det same gjennom det meste av filmen. For mykje av skrikande offiserar og sveittande rekruttar som gjer harde øvingar, i god «En offiser og en gentleman»-tradisjon. Det blir noko repeterande over dei stadige ekstra hindera Ellis møter på. Litt for lite dramaturgisk utvikling. Litt for lite spennande korleis dette til slutt skal gå.
Så var det dette med kritisk avstand til seg sjølv og si eiga historie. Ellis må nemleg vera noko av det naeraste eg har sett eit perfekt menneske. Same kor nedrige og faele alle andre blir, er han utelukkande snill, storsinna, tolmodig, empatisk, sterk – og sjølvsagt vakker. Så perfekt at han nesten blir vanskeleg å tru på.
Regissør Bratton baserer historia om Ellis på si eiga historie. Bratton var ung, svart, homofil og blei marinejeger frå 2005–2010.
Problemet for «The Inspection», er at det blir litt for mykje av det same gjennom det meste av filmen.