Viking og fleire toppklubbar vil søke om pyro-dispensasjon
FOTBALL: Norsk fotball samarbeider no for å tillate bruk av pyro på norske fotballstadioner. Viking og supporterane er av fleire som ønskjer å få til ein løysing.
– Det er enormt positivt at dei gjer dette. Bluss og blinkarar er ein del av opplevinga på fotballkampane, seier Roar Åkerlund, styreleiar i VikingHordene.
Viking har, i lag med andre norske toppklubbar, eit ønskje om å få gjennomslag for ein dispensasjon i forskrifta om bruk av pyroteknikk.
Dette initiativet har klubbane, Norges Fotballforbund, Norsk Toppfotball og Norsk Supportertallianse stilt seg bak.
Difor meiner han det er naudsynt å få bruken av pyro inn i lovlege rammer. Det har fotballtilhengjarane jobba for, seier Åkerlund.
– Det er viktig at supporterane blir tatt på alvor, og at vi får eit regelverk der alle partar er einige, legger han til.
Etter at klubbar og supporterar hadde eit møte med regjeringa i starten av april, skal det no sendast inn søknad om dispensasjon for bruk av pyroeffektar på fotballkampar.
Styrker samarbeidet
Over vinteren har representantar frå klubbar, supporterar og norsk toppfotball jobba tett saman for å utvikle eit rammeverk for korleis ein skal bruke pyroeffektar på ein forsvarleg måte.
Dagleg leiar i Viking, Eirik Bjørnø, fortel at klubben og Felt O har eit godt samarbeid kring pyroteknikk.
Han har eit ønske om trygge og stemningsfylte rammer rundt kampane deira.
– For å få til det må vi fjerne element som kan utgjere ein fare for publikum. Vi må gjere gode sikkerheits- og beredskapsavgjerder på stadion, finne ut kvar og når supporterane kan bruke pyro trygt, og at dei sjølve har god opplaering i å bruke det, slik at risikoen kan senkast, seier han.
– Ikkje konstruert for å brukast på stadion
For å bruke pyrotekniske effektar på fotballarrangement, må det givast løyve av brannvesenets leiar og stadioneigar/-arrangør, dette er fordi ein vil bevare tryggleiken til publikum og spelarar.
Nicolai Berner, avdelingsleiar i førebyggande avdeling i Rogaland brann og redning IKS, fortel at pyro er meint til naudstilfelle og ikkje til å lage stemning på stadion.
– I tillegg kan det vere brannfarleg då den har ein sterk flamme, som kan vere vanskeleg å sløkke. Den slepp også ut ein del røyk som kan vere sjenerande for folk i naerleiken, seier Berner.
Debatten om bruk av pyroteknikk på norske fotballtribunar tok for alvor fyr hausten 2019. Sidan den tid har temaet stadig vore ein diskusjon. Per i dag er bruk av pyro på tribunen blant publikum ikkje tillate.
Ny fyr i debatten
I helga blei det satt ny fyr i debatten då det blei kasta bluss på bana under lokaloppgjeret mellom Fredrikstad og Sarpsborg 08. Kastinga av nødbluss forårsaka betydelege skadar på fotballbana, samtidig som fleire personer pådro seg mindre skadar.
I Vikings stadionreglement er det forbode å ta med seg pyroeffektar på stadion.
Dispensasjonen klubbane søker om, skal sjåast som eit pilotprosjekt. Ei eventuell løyve vil bli gjeve for ein tidsavgrensa periode og evaluert undervegs. Det skal sørge for trygge rammer rundt bruken av pyro.
Cato Haug, som er styreleiar i Norsk Toppfotball, meiner ei godkjenning av pyrobruk er viktig av to grunnar.
– Punkt éin er at det er ei viktig del av supporterkulturen. Punkt to er at det i dag er eit totalforbod, og det fungerer ikkje, har han tidlegare uttalt til TV 2.