Gaustatoppen må ikkje bli spekulasjonsobjekt for private
Etter at Forsvaret sa opp leigekontrakten med Forsvarsbygg, vil Forsvarsbygg kvitte seg med heile eigedomen i Gaustatoppen, truleg fordi dei ikkje lenger har bruk for han.
Eg er usikker på om salget bare omfattar baneanlegget, eller om det også gjeld arealet rundt toppen ned til høgdekote 1600 moh., med frådrag av Telemark Turistforenings tomt rundt si eiga turisthytte.
Er det bare snakk om salg av baneanlegget, vil det vera mest naturleg at Statsbygg, eventuelt Telemark fylkeskommune saman med Hjartdal og Tinn kommunar sikrar seg dette, for så eventuelt å inngå avtale med Gaustabanen AS om drift av banen vidare, noko som så langt har vore relativt vellukka.
Gjeld salget også sjølve fjellarealet rundt toppen, må dette sikrast statleg eigarskap, mot at det blir innløyst gjennom erstatning til tidlegare grunneigarar, dersom avtala er slik at det skulle falle tilbake til desse når behovet og bruken av området opphøyrer.
Dette er vanleg prosedyre når Forsvaret ikkje lengre har bruk for området. Overdraginga bør skje vederlagsfritt frå eitt statleg organ til eit anna.
Gaustatoppen er ein nasjonal naturskatt. Det vil vera naturleg at Miljøverndepartementet gjennom Direktoratet for naturforvaltning, og regionalt Fylkesmannen, får forvaltaransvaret for dette unike fjellområdet i tida framover.
Gaustatoppen med Gaustaråen og Gaustaknea ligg frå naturens side tilfeldigvis i Hjartdal og Tinn kommunar, men er ei naturens gåve til heile nasjonen. Fjellet er unikt og er til stor glede i opplevinga og folkehelsas teneste for alle som har dette som det fremste turmålet sitt. På natur- og kulturarrangementet «Gaustadagen» finn over 3.000 menneske vegen til toppen, og gjennom året gjestar 50 til 60.000 dette fjellet. Til og med på 17. mai tar mange skituren opp for å feire nasjonaldagen til fjells.
Etter at nyheita om at baneanlegget i Gaustatoppen er på salg, har kommentarane frå ulike hald ikkje latt vente på seg. Eg undrar meg over så sterke interesser og meiningar om Gaustatoppen og banen der si framtid frå slike som nesten ikkje har vore der og ikkje kjenner dette som sitt kjære fjell, og med det ser på det som ei naturgåve.
Rett nok er eg einig med dei som meiner at private og griske hender ikkje må få kloa i Gaustabanen, og med det ta grepet om heile Gaustatoppen som ein privat herlegdom.
Men avgjerdsla om at det offentlege sikrar seg eigedomsrett og forvaltningsansvar hastar før eit stortingsval til hausten med usikkert resultat, som i verste fall kan bety privatisering av heile naturherlegdomen og «indrefileten» i norsk fjellnatur.