Frps kalde kulturpolitikk
Kulturlivet i Norge er inne i ein gullalder. Aldri før har det vore satsa meir på kultur. Kulturlivet blomstrar som aldri før. Det er lov å vere stolt over kulturbudsjettet som blei vedtatt i Stortinget torsdag. Og det er viktig å merke sei dei store forskjellane det er mellom regjeringas kultursatsing på den eine sida, og spesielt Frps alternativ på den andre.
Vi har i mange debattar i det siste høyrd frå representantar frå Frp at dei er lei av at dei ikkje blir sett på som å vere opptatt av kunst og kultur. Men dei må sjølv gjere noko med politikken og budsjetta sine skal dei ha truverdigheit på kulturfeltet. Når dei foreslår eit kutt på 1, 524 milliardar kroner i kulturbudsjettet skal det litt til at ein får omdømme som å vere opptatt av å styrke kulturlivet. Og det er ikkje summen i seg sjølv berre, der er kvar kutta faktisk skal takast.
Satsinga på kunstnarformål held fram med den raudgrøne regjeringa. Det er viktig for Arbeiderpartiet å legge forholda til rette for at enkeltkunstnarar skal kunne bidra til eit mangfaldig og nyskapande kunstliv. Vi har også nettopp behandla den første stortingsmeldinga nokon gong på det visuelle kunstfeltet.
I år delast det ut statsstipend til tre viktige kunst og kulturaktørar; Mari Boine, Morten Jostad og Peter Normann Waage. Eg meiner statstipendordninga er svært viktig, men vi merkar oss at Frp igjen foreslår å avvikle heile ordninga.
Ein kan spørje seg kva for kår kunsten og kulturen går i møte dersom ein skulle få ei mørkeblå regjering der Frp fekk dominere på dette feltet. Det vil bli ei rasering av norsk kunst og kulturliv, der berre dei sterkaste og mest kommersielle ville klare seg.
Det er spesielt at Frp er opptatt av å detaljstyre innhaldet i advents barne TV. Dei argumenterer med at Jesus er ein viktig del av norsk kulturarv. Men kva for politikk har dei eigentleg for norsk kulturarv? Det er altså ikkje så viktig med norsk folkemusikk, gamle handverkstradisjonar og eller samisk musikk? Vi veit at dei smalare sjangarane, sentrale delar av norsk kulturarv, er avhengig av offentleg støtte for å greie seg. For oss som er opptatt av å ivareta og vidareutvikle norsk kulturarv, så veit vi kor viktig denne støtta er.
Det byggast nye store kulturbygg over heile landet. Dei fyllast med innhald og glede for barn, unge og eldre i mange lokalsamfunn og fylker i heile landet. Men det kan ikkje Frp takkast for.