Mot rekord for alp Inanlegga
Drømmeveret i påska kan gje rekord for fleire av skianlegga i fylket. Millionane trillar inn kvar einaste dag.
VINJE Det viser ein ringjerunde som Varden foretok i går dei mest sentrale aktørane i fylket.
– Folk storkosar seg. Her er det berre blide fjes å sjå. Anlegget har vore stengt eit par gonger i vinter, noko som er uvanleg lite. Det har vore ein fantastisk sesong, seier marknadsansvarleg Kristin Person i Haukelifjell skisenter til Varden. Ho legg til at skjærtorsdag og langfredag tradisjonelt er toppdagane.
Null klager|
Totalt er rundt 20 personar i sving i dette anlegget.
– Det er moro å jobbe når forholda er så flotte. Eg har ikkje fått ei einaste klage, seier Kristin Person.
Driftsleiar Nils Asbjørn Hau- gen ved Haukelifjell trur at tidleg påske kan setje ein stoppar for sesongrekord, men han melder om ei dagsomsetning hittil i påska på rundt 150.000 kroner. Torsdag og fredag reknar han med at den stig til 200.000 kroner. Da trur Haugen på 2.500 personar i bakken, mot rundt 1.700 i starten av høgtida.
– Vermessig er visst dette den flottaste påska sidan 1978, seier Haugen.
Toppen
Dagleg leiar Petter Johnsen ved Vrådal Panorama kom til denne bygda i Kviteseid hausten 1978.
– Eg kan ikkje hugse ei einaste påske der veret har vore i nærleiken av i år. Budsjettet vårt for påska på vel fire millionar kroner. Det trur eg me passerer, så det ligg an til rekord, seier Johnsen. Han sit i solveggen og ser på løparane som kan velje mellom 15 nedfartar og sju heisar.
Optimismen er ikkje mindre hjå dagleg leiar Bjørn Svalastog ved Rauland skisenter.
– Frå laurdag til og med måndag hadde me ei omsetning på 1,2 mill kroner. Dermed er det mykje sannsynleg at senteret når ei påskeomsetning på over tre millionar kroner. Klaffar alt, kan også årsrekorden på 17,3 mill kroner bli slegen, seier Svalastog.
Hans kollega Alf Samuelsen ved Raulandsfjell Alpinsenter smiler også om kapp med påskesola.
– Me har rundt 200–400 personar i bakken, og ei dagsomsetning på 70.000 kroner. Her er det ideelle forhold, opplyser Samuelsen som har åtte nedfartar.
Alt i drift
Fornøgd er også dagleg leiar Bjørn Halvor Roalstad ved Gautefall skisenter.
– Mesteparten av rammene er lagt. Her er det bra med folk. Det er vanskeleg å vite om det blir rekord, men dette veret får folk til fjells. Det er etterbestillingar på overnatting, noko som er eit godt teikn, seier han.
Dagleg leiar Roar Solli ved Hallbjønnsekken skisenter i Tokke seier at anlegget nok ligg tett opp mot dei beste åra. – Det er ideelle forhold med puddersnø, seier han.
Lars Svartdal ved skisenteret på Gaustablikk seier at det kan bli rekord, men han tør ikkje fastslå det før sesongen er over.
– Uansett blir det nok brukbart. Måndag var dagsomsetninga på heiskort 200.000 kroner, opplyser Lars Svartdal.