Saftig lønnshopp i kommunalt e-verk
Resultatet blei redusert frå 10,7 til 3,2 mill kr på eitt år. Lønna til toppsjefen auka likevel med 299.000 kroner.
Adm. direktør Jon Arne Mørch Jonassen kan smile. Han er toppsjef i det interkommunale selskapet Midt-Telemark Energi, som er eigd av kommunane Bø, Nome og Sauherad. I 2011 fekk MTEsjefen utbetalt 1.069.000 kroner i lønn og anna godtgjersle. Året etter var beløpet auka til 1.368.000 - eller nær 28 prosent. Lønna i 2012 var på 1.207.000, og ekstra godtgjersle kom opp i 161.000 kr.
Kjøpte ferie
– 2012 var litt spesielt. Eg fekk kompensert for ferie som eg ikkje fekk teke ut som følgje av kraftfusjonane. Dette blei utbetalt som lønn, seier Jon Arne Mørch Jonassen til Varden. Han opplyser at lønna var 1.150.000 og feriekjøpet såleis utgjorde 57.000 kroner.
– Lønna er tilpassa nivået i bransjen. Eg ligg under landsgjennomsnittet, og på line med tilsvarande selskap i fylket. Skagerak ligg langt over. Det folk gløymer er overtida. For min del ligg den på 700-800 timar i året. – Kva med lønna di i 2013? –Den har auka mindre enn bransjen. No er ordinær lønn 1,2 mill kr.
Vil ikkje
– Resultatet har gått ned?
–Dette er styrt av rammer frå NVE. Me er supergode heile tida, seier adm. direktør Jon Arne Mørch Jonassen.
Tidlegare Bø-ordførar Gunleik Hynne var styreleiar ved lønnsjusteringa. Han er no ute av styret, og ønskjer derfor ikkje å kommentere saka.