Høgre strupar kommunane

Økonomi

Svar til Solveig Sundbø Abrahamsen (H) om eigedomsskatt på arbeidsmaskiner m.v. i verk og bruk.

Sundbø Abrahamsen ynskjer å sjå heilskapen i forslaget som regjeringa nå har på høyring. Då skal eg hjelpe til med det: Heilskapen for norske kommunar er at vi har ei regjering som ikkje prioriterer velferd og gode og trygge lokalsamfunn.

Forslaget vil ta vekk skattegrunnlag for kommunane. Dette vil gje mindre pengar til å drive skule, eldreomsorg og næringsutvikling der folk bur. Når regjeringa heller ikkje kompenserer manglande skatteinntekter i kommunane fullt ut, er dette ein alvorleg situasjon. Mange kommunar kjenner seg pressa til å innføre eigedomsskatt. Kommuneøkonomien har vorte svekka heilt sidan Sundbø Abrahamsen tok turen til Løvebakken for to år sidan. Dette er ein ønska politikk frå H og Frp, slik at det skal bli enklare å slå saman kommunar, sentralisere og privatisere. Andre døme på denne politikken er politireforma, som vil gje mindre nærpoliti, og sjukehusforetaka, som har ført til nedlegging av Rjukan og Kragerø sjukehus og eit svekka DPS i Seljord. I sum gjev det mindre tryggleik og reduserte tenestetilbod i Seljord og i Telemark.

Senterpartiet ynskjer å bruke meir pengar på lokal velferd, og vi seier ja til nærpoliti og lokalsjukehus.