Dei aktiviserer bå de unge og gamle
Gjennom 20 år har dei stått på for at motorungdommen i regionen skal ha eit tilbod.
Brørne Hallvard og Nils Torfinn Ralle har jobba for Rallebanen sidan starten i 1995, og det blir sett pris på i klubben NMK Bø som tel rundt 45 medlemmer.
I tipset om julekringle frå eit medlem heiter det at den vesle klubben har stram økonomi, men ei dugnadsånd som mange kan lære mykje av.
– Alle er blide og står på for at andre skal kome ned på Rallebanen, køyre under trygge forhold og ha det moro, skriv innsendaren.
Tok initiativet
Det var far til brørne, Eivind Ralle, som tok initiativet til Rallebanen for rundt 25 år sidan.
– Den gongen var det eit tilbod nær skyttarbanen i bygda, men det fall bort. Det irriterte pappa, og dermed opna han for etablering av bane her på garden. Det er også greitt med eit tilbod som ligg utanfor sentrum av bygda, fortel Hallvard og Nils Torfinn Ralle. Dei rosar dagens leiing i klubben, Vidar Drøivold, Tore Innleggen og Ragnar Lund, samt eit talrikt korps av dugnadsarbei-darar som alle gjer ein framifrå innsats for at tilbodet skal bestå.
Oppsving
Ralle-brørne seier at klubben har fått eit oppsving dei siste åra.
– Det skuldast eit fantastisk samarbeid der alle jobbar godt saman. Det sosiale miljøet gjer at me har bruka tida på dette tiltaket, understrekar Hallvard Ralle. Han meiner at klubben gjennom arbeidet har fanga opp ungdom som har slite med å finne seg til rette andre stader.
– Eg trur nok klubben har redda tre-fire personar frå å hamne på skråplanet. Her liker dei seg og føler seg noko verdt. Ingen blir slått handa av i NMK Bø, seier Hallvard Ralle.
Alle aldrar
Han fortel at klubben har 25 aktive deltakarar, og at den femnar frå yngste aldersklasse og opp mot 70 år. Det blir lagt stor vekt på sikkerheit ved bruk av banen, og klubben har så langt unngått alvorlege ulykker, ifølgje Hallvard Ralle. Han har nettopp gått av med pensjon etter rundt 44 år som sjåførlærar. Han sjølv liker å konkurrere, og det gjer også Nils Torfinn som har sopa inn mange pokalar etter meir enn 30 år som konkurransekøyrar. Nils Torfinn har delteke i fleire landsfinalar, seinast på Kongsberg i år.
– Me har fleire kvinnelege deltakarar i klubben. Det skaper eit rikare miljø, avsluttar Rallebrørne.