Trår til for Rikke i
I kampen mot kreftcellene får Rikke Øien Nykos enorm støtte av venninna Gunlaug G. Svalastoga.
RAULAND – Gunlaug er unik, seier Rikke som fekk ein alvorleg kreftdiagnose 6. august i år. I månadene etterpå har bardomsvenninna Gunlaug stilt opp på mange vis for Raulands-kvinna som har tre barn på 4, 6 og 11 år. I kampen mot sjukdommen har Rikke vist enormt pågangsmot og stå-påvilje. Dette er blitt lagt merke til i nærmiljøet.
Sprer humør
Ein tipsar, som meiner at dei to saman har gjort seg fortent til Vardens julekringle, skreiv mellom anna følgjande til avisa:
– Gunlaug stiller opp med barnepass, lagar sunne smoothier, drar ho med seg på turer til Falkeriset og andre trimturar, ho er alltid i godt humør og får andre rundt ho til å bli i godt humør. Er veldig omtenksam og tenkjer på andre før seg sjølv. Rikke har trass alvorleg sjukdom, stått på med godt mot og godt humør. Ein meister til å tenkje positivt og ein utruleg stå-på-vilje. Ønskjer at desse to får nyte kringla saman.
Veldig overraska
Kvinnene har halde saman sidan dei voks opp i same huset i Haukeli frå siste del av 1970-åra. Dei synest påskjøninga er heilt topp.
–Kjempetriveleg. Eg blei heilt «sett ut» da Gunlaug ringte, seier Rikke. Ho er ved godt mot, og aktar ikkje at kreftcellene skal vinne denne kampen.
– Eg er 40 år og har tre barn som eg har lyst til å å følgje vidare i livet. Siste undersøkinga synte at kreftsvulstane er blitt mindre. Cellegifta virkar, seier 40-år gamle Rikke. Ho seier at er det viktig å leve så normalt som mogleg, men vedgår at i ein slik tøff kamp er blir et både opp- og nedturar. Ho rosar elles systera Mari, Rauland barnehage, der ho er pedagogisk leiar, kreftavdelinga på Moflata, samt ektemann, foreldre, barn, resten av familien og fleire i nærmiljøet for svært god støtte.
Lyst til å hjelpe
Rikke seier at støtta frå Gunlaug er svært viktig for barna, og at dei føler tryggleik når venninna trår til med henting i barnehage eller andre oppgåver. Det høyrer med at dei har to døtrer på elleve år som er blitt bestevenninner. For Gunlaug er det sjølvsagt å hjelpe til.
– Eg gjer det av lyst og ikkje plikt, seier 41-åringen som utvilsamt er eit omsorgsmenneske av dei sjeldne. Ho er vidare full av beundring over korleis den gode venninna taklar kampen mot sjukdommen.
Halvor Ulvenes