Aust eller vest – kva er best?
Da kommunane blei pålagt å utarbeide planar for endring av kommunestruktur, meinte eg at Lifjell Rundt eller noko tilsvarande var det alternativet Sauherad burde samle seg om. Sauherad kommune valde også slik i starten av prosessen. To grunnar til at eg såg dette som rett: 1. Området har så mange felles interesseområde å samlast om. 2. Einaste måten å unngå å dele Sauherad. Etter kvart som nabokommunane våre har hoppa ut av og inn i diverse prosjekt, har politikarane våre, utan synbar egen vilje, godtatt ei polarisering mellom aust og vest i vårt distrikt, og dermed også i eigen kommune. Nå står politikarar fram som talsmenn for å dele kommunen. Svært spesielt. Folkemøta så langt har ganske eintydig sagt frå om – ikkje at ein fyrst og fremst ønskjer å dele kommunen, men at deling blir resultatet når ein må velje side: aust eller vest. Bø og Nome har tatt sine val, greitt nok, politikarane våre har blitt med på reisa. Kanskje fordi dei ser deling som ok, eller fordi dei ikkje har nytta høvet til å bruke politisk makt og kløkt til å føre oss fram til eit samlande, ikkje splittande resultat. Det har vori lite konkret å høre frå kommunestyrerepresentantane så langt. To ferske innlegg i media frå representantar for SP rår til å velje MidtTelemark-alternativet. Rekkedal og Slettebø ser det mangeårige MT- samarbeidet som så vellykka at det er grunn god nok til samanslåing med Nome og Bø. Nå er det slik at samarbeid på tvers av kommunegrenser er svært utbreidd over heile landet, ikkje unikt her hos oss. I løpet av samarbeidsperioden har folketalet i to av kommunane gått tilbake, økonomien i alle tre er svært pressa, skular er lagt ned. Rekkedal brukar til og med nedlegging av skular i Sauherad som modell for vellykka omorganisering! (her er ikkje plass for korrigerande argumentasjon frå mi side rundt dette nå). Ved fleire høve har Midt-Telemarkrådet blitt korrigert for manglande omsyn til Sauherads nødvendige kontakt med distriktet aust for oss.
Eg ser derfor ikkje mange gode grunnar til at eit Midt-Telemarksamarbeid vil føre til vekst og utvikling i Sauherad. Mulighetane til rasjonaliseringsgevinst er likeleg fordelt mellom dei to avtalene. Alt kjem an på i kor stor grad ein veljer å rasjonalisere, og kor klokt det blir gjort. Svært få av oss har bedt om kommune-endring, prosessen er politisk styrt sentralisering.Val av alternativ blir ein del synsing, ein del fakta, men mest om kva ein ser for seg av utvikling i samfunnet framover. Aust – avtala vil på sikt vera best for heile kommunen, og med eit innhald som med stor fordel kunne vori grunnlag for eit samarbeid mellom midt og aust. Nå kan ansvaret for sakene under bli gjenstand for tautrekking mellom to partar, som slett ikkje har vist vilje til å samarbeide, og slikt er ikkje bra. Eg satsar på ei Aust-Telemark-avtale m.a. av desse grunnane: Ansvar for eit sjukehus for regionen. Felles legevakt Samling om støtte til framtidig jernbanedrift i området, E 134, RV 36 Svært profesjonelt brannvesen Høgskulen Klar invitasjon til samarbeid med Kongsberg-regionen Likt gebyrnivå Servisetorg i tettstadene Flyplass Samarbeid om store investeringar fram til ny kommune/kommunesamanslutning
Utvikling av grendene, aktiv kommunal medverknad ved utbygging Aust er store på kraft Verdensarv, austkanalen, turisme, utmarksnæring
I tillegg er me kjent med vegvesenets planar om ny veg Grenland - E 134 på austsida. - svært viktig for store delar av Sauherad. Det er trist at politikarane i Sauherad aktivt tek val som deler kommunen. Me i øvre delar har lært kva slags barrierer som ligg i ei kommunegrense. Men dersom me må gjera eit val mellom aust eller vest, blir Aust-Telemark mitt val. Eg skulle aller helst hatt Midt-Telemark med på laget.
Nils Angard