Gravla plan om storkommune
Eit knapt fleirtal i Nome kommunestyre la torsdag saka om storkommune i midtfylket død.
Tormod Halvorsen (Ap) foreslo at kanalkommunen avsluttar saka. Grunngjevinga hans var nei frå Bø og resultatet av folkerøystinga. Framlegget frå Halvorsen fekk 15 røyster medan midretalet på 13 representantar støtta eit forslag frå varaordførar Stig Kjeldal (H)
Sterk splid
Halvorsen fekk med seg fleire andre parti, men voteringa synte at det er sterk splid i Arbeidarpartiet. Eit fleirtal på sju i Apgruppa, deriblant ordførar Bjørg Tveito Lundefaret, støtta nemleg framlegget frå Stig Kjeldal (H). Det framlegget seier at ein får best tenestetilbod med ny storkommune, men at ein tek avslaget frå Bø om nye forhandlingar til etterretning.
Vidare heiter det i framlegget hans at Nome avventar avgjerda i Stortinget, der saka kjem opp neste år.
Må gravlegge
– Eit historisk vedtak. Eg er fornøgd, seier veteranen Tormod Halvorsen til Varden etter voteringa. Halvorsen opplyser at på medlemsmøtet i Arbeidarpartiet sist veke var det fleirtal for å stå åleine. I innlegget sitt karakteriserte han planane til statsråd Jan Tore Sanner om samanslåing som mislykka.
GRUPPEMØTE:
Partifelle Knut Helkås Dahl understreka at det no er viktig å gravleggje stridsøksa i denne saka. Torunn Brukåsa Kleiva hadde sitt eige framlegg, men trekte det og støtta Ap. Sp-representanten peika på at det er viktig å respektere folkerøystinga.
Mette Sanden (SV) sa at partiet hennar har vore klar heile tida på at Nome må vere eigen kommune.
– Større einingar er ikkje meir effektive, men det viktigaste er å respektere folkerøystinga. Eg har ikkje funne nye forhold i denne saka, sa Sanden.
Tidlegare varaordførar Hans G. Jørgensen (H) sa at kommunestyret må respektere folkemeininga.
Ja til Sluserock
På tampen av møtet vedtok kommunestyret budsjettet for 2017. Ordførar Bjørg Tveito Lundefaret sa seg glad for at barnehagetilbodet i kommunen blir utvida. Ho såg det som viktig sidan innflyttarar får 100.000 kroner for å etablere seg i kommunen.
Elles får Sluserock 100.000 kroner i støtte, men 2017 er siste året arrangementet blir drive i kommunal regi.
To eldresenter i kommunen er sikra vidare drift neste år.