Vil hindre p-kaos ved Bø stasjon
Eksterne konsulentar skal vurdere ulike utbyggingar rundt Bø stasjon for å møte trafikken i 2030.
– Oppdraget med å lage ein studie er lyst ut, og eg reknar med at rapporten som syner moglegheitene rundt Bø stasjon er klar i mars i år. Bane Nor, Telemark fylkeskommune og Statens vegvesen er med på dette spleiselaget, opplyser planrådgjevar Kristin Karlbom Dahle i Bø kommune til Varden. Studien vert gjennomført i regi av Bygdepakke Bø.
109 bussavgangar
– Det er enorm trafikk til og frå stasjonen med 109 daglege bussavgangar og 18 togavgangar i døgnet. Bø stasjon har 44 parkeringsplassar, så kapasiteten er alt sprengt. Bane Nor har eit område på sørsida av stasjonen som kan vere aktuell som ei tilleggsparkering. Med tilkomst over Borgjabrua kan den løysin- ga realiserast raskt, seier Karlbom Dahle.
I nemnde studie skal konsulentane sjå på arealbruken i stasjonsområdet, for å ta høgde for trafikken om 13 år.
– Me vil også leggje til rette for meir bruk av sykkel. 70 prosent i Bø bur i sykkelavstand til jobb/skule, så her er det eit stort potensial for å få ned bilbruken. Eit eige sykkelhotell ved stasjonen kan vere eit alternativ, for trygg plassering av dette transportmiddelet. Hittil har det vore mange sykkeltjuveri i sta- sjonsområdet, seier Kristin Karlbom Dahle.
Ny sentrumsplan
I fyrste halvår skal kommunen elles utarbeide ein ny sentrumsplan.
– Der blir parkering eit tema, og i framtida er det ikkje ønskjeleg med køyring frå butikk til butikk. Folk i bygda er vant til mange parkeringsplassar, men også i framtida må det vere slik at ein kan kome til sentrum med bil. I ein ananlyse av fortettingspotensialet - utarbeidd i regi av Bygdepakke Bø - skriv konsulentselskapet Rambøll at ein kan klare seg med ti prosent av dagens parkeringsareal i Bø sentrum. Rambøll meiner at alle dei tusen nye innbyggjarane - som prognosen seier Bø vil få innan 2030 - kan få plass innanfor sentrumsgrensa. Innfartsparkering kan vere eit alternativ, seier Kristin Karlbom Dahle som skal innhente faglege råd om løysingar.
I framlegget til sentrumsplan vil ho lage ein oversikt over dagens parkeringsplassar. Planen vil drøfte mange problemstillingar knytt til utviklinga av Bø.