Framtida treng importvernet
Vest-Telemark Bonde- og Småbrukarlag åtvarar sterkt mot å svekkje importvernet for norsk matproduksjon, slik regjeringa går inn for i stortingsmeldinga om landbrukspolitikken.
Importvernet set oss i stand til å nytte våre eigne ressursar i inn- og utmark for å dekkje mest mogleg av behovet vårt for matvarer. Utan eit slikt vern vil det ikkje vera mogleg for landbruket i Noreg, og slett ikkje i Vest-Telemark, å konkurrere med import frå land med lågare kostnader, flatare landskap, laglegare klima og større gardar.
Eit effektivt importvern er ein føresetnad for marknadsreguleringa av jordbruksvarer, og dermed for avtalesystemet i jordbruket. Meldinga seier at regjeringa vil halde fram med avtaleinstituttet, men vil i praksis gjera tingingane avmektige. Med meir import og mindre marknadsregulering tømest den politiske verktøykassa, og det blir endå vanskelegare å nå dei måla Stortinget set for naeringa.
Importvernet sikrar forbrukarane. Vest- Telemark Bonde- og Småbrukarlag vil saerleg peike på kor viktig importvernet og marknadsreguleringa er for dei små ku- og geitemjølkprodusentane som er typiske for Vest-Telemark. Frå 2015 til 2016 auka importen berre av ost med eit volum som svarar til mjølkeleveransane frå 40-50 norske gjennomsnittsbruk i året.
Sjølv om ostediskane i supermarknadane dermed får eit breiare utval, er det uansvarleg og kortsiktig å hevde at dette er ei utvikling som forbrukarane er tende med. Ingen har garanti for at Noreg om nokre år skal kunne kjøpe den maten me treng, etter at politikarar på popularitetsjakt har fjerna evna vår til å produsere matvarer på eigne ressursar.
Bøndene i Vest-Telemark kan ikkje konkurrere med industrijordbruket i EU viss det er om å gjera å produsere store mengder kjøt og mjølk til låg pris. Men ingen kan konkurrere med gardsbruka i Vest-Telemark når det gjeld å nytte ut areala i dette distriktet på ein langsiktig og berekraftig måte, for å produsere varer folk treng kvar dag i all framtid. Dette er hovudoppgåva til landbruket. Med på kjøpet får samfunnet folkerike bygder med velstelte kulturlandskap og mange naeringsvegar.
Noreg treng fleire gardsbruk i drift. «Endring og utvikling» er tittelen på landbruksmeldinga. Det er politikarspråk for endring og avvikling. I den verda me ser framom oss i dag, vil klimaendringar og folkeauke gjera det stadig meir krevjande å fø alle. Då er det lite framtidsretta å tufte vår eiga matforsyning på at me til ei kvar tid skal kunne importere fôr og ferdigvarer.
Ein framtidsretta jordbruksproduksjon må syte for at landet får fleire gardar i drift, ikkje faerre. Til det duger dessverre ikkje Meld.St. 11 (2016-2017). Vest-Telemark Bonde- og Småbrukarlag oppmodar alle som ønskjer å tene Telemark på tinget frå hausten om å bli med og avvise landbruksmeldinga frå regjeringa.