5.000 tonn skal vekk
Nesten 5.000 tonn med grus og sand blir no feia vekk frå gang- og sykkelvegar i Skien og Porsgrunn.
– Totalt skal 56 mil med vegar, gangvegar og fortau sopast. I Skien har det gått med om lag 3.000 tonn med grus på islagte vegar i vinter. For Porsgrunn er talet i underkant av 2.000 tonn, opplyser kommunikasjonsansvarleg Birgitte Finne Høifødt i Bypakke Grenland.
Hindrar ulykker
I god tid før påske skal hovudrutene vere klare. Etterpå blir det feia område for område. Finne Høifødt oppmodar derfor folk om å ta fram sykkelen og opplyser at fjerning av grus og sand er viktig for å redusere talet på sykkelulykker.
– Mykje grus på sykkelvegane er ei årsak til at folk kviar seg for å ta fram sykkelen, seier Finne Høifødt.
Med høgare driftsstandard på kommunale og fylkeskommunale sykkel- og gangvegar er det blitt lettare å utvide sykkelsesongen.
Nesten dobling
– Eit resultat av dette er at fleire nyttar sykkelen. På landsbasis har ein i løpet av dei siste åra dobla talet på vintersyklistar, seier Birgitte Finne Høifødt.
Samarbeid med vegvesenet
Feiing av vegane er ein del av prosjektet forsterka vintervedlikehald. Dette er eit bypakkesamarbeid mellom kommunane Skien, Porsgrunn og Statens vegvesen. Tiltaket er delfinansiert med statlege midlar.
– Kva skjer med grusen som blir sopa opp?
– Dette er forureinsa materiale som skal leverast til godkjend deponi. I Porsgrunn blir grusen frakta til deponiet i Pasadalen.
– I Skien er det mellombels lagring på Geiteryggen. Dette er godkjend som ei mellombels løysing, men kommunen jaktar på ei permanent ordning for lagring av sand og grus som er strøydd på vegane i vintermånadene. Lagringa på Geiteryggen skjer derfor i påvente av ei permanent ordning, sier kommunikasjonsansvarleg Birgitte Finne Høifødt. halvor.ulvenes@varden.no