Ei anna utvikling trengst for politiet
Sør-Øst Politidistrikt er stort på same måte som heile landet vårt er stort; lange avstander og spredd busetnad. I Senterpartiet er vi overtydde om at vi treng eit reelt naerpoliti for å sørgje for gode polititenester for alle innbyggjarane.
Vi tykkjer det er viktig at representantar for politiet åtvarar når dei meiner utviklinga går feil veg, slik Stine Benjaminsen Nygård, lokallagsleder Politiets Fellesforbund Sør-Øst nyleg gjorde.
Regjeringspartia seier òg at dei ønskjer det beste for befolkninga i form av gode polititenester, men dessverre gir regjeringa befolkninga det stikk motsette av eit naerpoliti. Vi meinte frå starten av at politireforma, slik den vart forma, ville føre til ei sentralisering av polititenesta. Dette meinte vi ikkje ville kome folk i utkantane til gode, men at situasjonen heller ville bli verre, med dårlegare førebyggande innsats og dårlegare beredskap.
Derfor gjekk vi ikkje inn i forliket på Stortinget om politireforma, som så vakkert vart kalla «naerpolitireforma» av regjeringa trass i at reforma innebar ei massiv nedlegging av lensmannskontor. Senterpartiet ønskte også ei politireform, men med vekt på kvalitetsforbetring, endring i kultur og betre samarbeid, ikkje på sentralisering.
I desse dagar blir karta over politibemanninga i Noreg teikna. Det kjem meldingar frå fleire politidistrikt om lensmannskontor som ikkje kjem til å få stadleg lensmann, om politikontaktar som skal dekkje fleire kommunar, om budsjettunderskot i fleire av politidistrikta. Dessutan er bemanninga for låg samtidig som økonomien er for stram til å tilsetje dei stillingane som politimeistrane har fått på papiret. Saerleg i kjølvatnet av regjeringa sitt framlegg til statsbudsjett har tilbakemeldingane vore sterke. Dei nyutdanna politistudentane er ikkje lenger lova jobb no som stortingsvalet er over, og det blir heller ikkje sett av midlar i statsbudsjettet til å tilsette desse.
Senterpartiet vil framleis vera eit tydeleg alternativ til regjeringas sentraliseringspolitikk, og vi vil halde fram med å kjempe viktige tenester naer folk. Dette inneber sjølvsagt meir budsjettmidlar til politiet, men vi har òg nyleg levert framlegg som skal handsamast av justiskomiteen på Stortinget ganske snart. Desse går ut på at det må skje ei reell styrking av dei lensmannskontora som står att etter reforma, at kvart lensmannskontor skal ha lensmann på staden og at det må nok bemanning på plass til å løyse oppgåvene politiet har.
Dette handlar om at politiet må kunne vera til stades der befolkninga er. Vi håper at det nye stortingsfleirtalet står bak oss og vil vera med på å rette opp kursen som denne politireforma er i ferd med å ta. Jenny Klinge Justispolitisk talskvinne, Senterpartiet Åslaug Sem Jacobsen Stortingsrepresentant, Senterpartiet