Eirik vann over gigant
Eirik Skogen vann kampen mot jernbaneselskapet. Bane Nor ville leggje tømmertransporten gjennom tunet hans.
Bøheringen, som ikkje ønskte dette, har fått medhald både av fleirtalet i Aust-Telemark tingrett og gjennom ein samrøystes dom frå Agder lagmannsrett. Kravet om ekspropriasjon av vegrett gjennom tunet vart avvist i båe instansane.
– Det er moro å vinne. No blir det spennande å sjå om selskapet ankar saka til Høgsterett, seier 74-åringen frå Bø til Varden. Da saka var på høyring til ulike instansar, var planframlegget frå Bane Nor at all transport skulle på den eksisterande vegen på vestsida av driftsbygningen til Skogen - og ikkje gjennom tunet.
Ein oversikt synte at oppgradering av den vestre vegen ville koste 1,3 millionar kroner, og derfor flytta Bane Nor traseen til tunet av økonomiske årsaker.
Ville ekspropriere
Det var 29. april i fjor at Jernbaneverket vedtok å ekspropriere varig rett til bruk og vedlikehald av eksisterande veg frå kommunale Flatinvegen gjennom gardstunet til Eirik Skogen for tømmerbil, lastebil og annan tungtrafikk. Skogen klaga over vedtaket, men Samferdselsdepartementet stadsfesta avgjerda i Jernbaneverket den 1. juli i fjor. Jernbaneverket sette fram krav om skjønn til AustTelemark tingrett. Fleirtalet i retten avviste dette. Bane Nor anka til lagmannsretten som stadfesta den førre dommen.
Lagmannsretten meiner at det er svikt i det faktiske grunnlaget for vedtaket om ekspropriasjon. Det blir her vist til blant anna feil tal for trafikkauken gjennom tunet til Skogen.
Vidare meiner retten at det er mangelfull informasjon om grunntilhøva i tunet. Retten meiner vedtaket om ekspropriasjon er ugyldig.
Anke?
– Eg er glad for at lagmannsretten sikrar vedtaket, men er forundra over at sorenskrivar Håvard Skjeldås hadde dissens og støtta Bane Nor i tingretten. Selskapet ville leggje om vegen for å spare 1,3 millionar kroner. No er Bane Nor påført sakskostnader som truleg utgjer kring ein million kroner, seier advokat Olav Felland. Han har ført saka for Eirik Skogen.
Pressekontakt i Bane Nor, Torgald Sørli, seier i ein kommentar til Varden at selskapet enno ikkje har teke stilling til om saka skal takast vidare i rettssystemet.