Utmarksbeite - ein viktig ressurs
Tidlegare i år blei det vedtekje ein beitebruksplan for Vinje kommune. Vest-Telemark Bonde- og Småbrukarlag tykte dette var eit godt initiativ frå kommunen si side. Fleire kommunar i regionen burde etter vårt syn fylgje opp med liknande planar.
Innleiingsvis i beiteplanen blir det slegje fast at beitebruken i kommunen er i stadig endring. Den er utsett for press frå fleire hald som m.a. landbrukspolitikken, rovvilt, turisttrafikk og hyttebygging. Det er ei uttrykt målsetting med planen å synleggjera trongen for beitebruk, sikre bruken av beiteressursar og leggje til rette for framtidig hausting.
I planen blir det dokumentert at beiteopptaket i Vinje utgjer ei avling tilsvarane det ein kan få frå ikring 6.500 da fulldyrka slåttemark. Til samanlikning er det i Vinje i dag om lag 10.500 da fulldyrka jord. Me snakkar om ein fenomenal lokal fornybar ressurs.
Sti- og løypeplan for Vinje kommune skal no vedtakast i kommunestyret før jol. Vest- Telemark Bonde- og Småbrukarlag sluttar seg i all hovudsak til planen. Tanken om å kanalisere ferdsel i så stor grad som råd er bra. Viktige og gode framlegg til tiltak er å skjerme område definert som viktige beiteområde for husdyr og leveområde for villrein for nye stiar.
Det er likevel eit framlegg til tiltak me reagerer saerleg på. Vegen til Tehytta med tilhøyrande parkeringsplass for 70 bilar vil kunne gjera dette til eit attraktivt utfartsområde på line med Falkenuten. Den merka stien er vel tenkt å ende ved Tehytta. Utvilsamt vil trafikken auke svaert mykje vidare innover Skarsnutdalen, eit område med mykje sau og som dertil er eit leveområde for rein. Alt i dag er trafikken i dette området ei stor utfordring for sauehaldet. Slik me les planen manglar det ei skikkeleg konsekvensutgreiing av dette framlegget.
Vest-Telemark Bonde- og Småbrukarlag vil be kommunestyret trekke dette tiltaket ut av planen.