Vinje og Seljord sa nei til eigedomsskatt
Kommunestyret i Seljord sa blankt nei til å innføre eigedomsskatt.
Det var berre Peter Fjågesund i Miljøpartiet dei grøne som røysta for eigedomsskatt, dei andre 20 politikarane i kommunestyret sa nei takk.
Det er klart etter at politikarane torsdag handsama budsjett for 2018 og økonomiplan for dei fire neste åra.
Rådmannen foreslo opphavleg slik skatt. Bakgrunnen for dette var behov for større inntekter. I formannskapet sa partia at dei ville kome tilbake til spørsmålet i kommunestyret, og resultatet der blei eit rungande nei.
Høgare inntekter
Ordførar Halfdan Haugan (Ap) seier til Varden at fleire forhold har endra seg etter at rådmannen kom med framlegget om eigedomsskatt i budsjettet for neste år.
– Prognosane for både konsesjonskraftinntekter og skatteinngang er blitt betre, men likevel er det eit krevjande budsjett, understrekar Haugan. Han synest det har vore overraskande lite engasjement blant innbyggjarane i spørsmålet om eigedomsskatt.
Kutt på 2,8 millionar kroner
Budsjettet i Seljord for neste år er på kring 290 millionar kroner.
– Gjennomgåande blir det reduksjon på ein prosent, eller rundt 2,8 millionar kroner. Alle sektorane blir berørt av reduksjonen, seier Seljordordføraren.
Han opplyser at Seljord Hage får eit etableringstilskot på 200.000. Bedrifta skal etablere ein botanisk hage i sentrum.
Får utviklingstilskot
Seljord Naeringshage er blitt ein suksess, som nyleg blei omtalt i Varden. Den verksemda får eit utviklingstilskot på 400.000 kroner for 2018.
Kommunestyret vedtok elles ei skulepakke på 1,3 millionar kroner, for å sjå på tilstanden ved skulane både i Flatdal og Seljord.
Kantine på ungdomsskulen
Politikarane vil ha kantinedrift på ungdomsskulen, ei satsing som kostar 116.000 kroner på årsbasis.
Ifølgje ordføraren er dette ei sak som har skapt engasjement i bygda under Skorve.