Kan stå ferdig i 2022
Traseen KastetStoadalen - med bru over Telemarkskanalen - kan tidlegast stå ferdig i 2022.
Det opplyser prosjektleiar Svein Andres Tovslid i Statens vegvesen.
Bru til 100 millionar kroner
– Dette er eit krevjande prosjekt, så her må ein rekne med ei byggjetid på halvtanna til to år, seier han.
I prosjektet inngår bygging av ei bru på kring 250 meter over Eidselva. Brua åleine vil truleg koste i området 100 millionar kroner.
Innbyggjarane langs Lannavegen på Ulefoss har venta i 40 år på ei løysing av vegproblema. Måndag var både samferdselsutvalet i Telemark fylkeskommune, formannskapet i Nome og representantar for Statens vegvesen på synfaring.
Skapte trøbbel
Alt låg til rette for gjennomføring av prosjektet etter tidlegare vedtak i Telemark fylkesting. Så dukka det opp ei fotnote om økonomien i prosjektet - som mange hadde oversett - og vips mangla det 80-100 millionar kroner.
No er Statens vegvesen i gang med eit nytt forprosjekt, blant anna for å redusere kostnadene. Vegsjef Tore Kaurin opplyser til Varden at viss Nome kommune og Telemark fylkesting godkjenner prosjektet i haust, og Stortinget vedtek prosjektet med bompengefinansiering våren 2019, kan bygginga starte i 2020. Med byggetid på eit par år betyr det opning i 2022.
Vilje til gjennomføring
Leiar av det fylkeskommunale samferdselsutvalet, Knut Duesund, sa at ein er ikkje komfortabel med situasjonen som har oppstått.
– Det er vilje til å gjennomføre prosjektet, seier han. I dialogmøtet uttrykte også fleire politikarar velvilje til prosjektet, deriblant Birger Hovden (Ap) og vararepresentant Halvor Lognvik frå Frp. Lognvik lova å gje klar beskjed til den faste representanten, Bård Hoksrud.
Positivt møte
Nome-ordførar Bjørg Tveito Lundefaret (Ap) seier i ein kommentar til Varden at dette blei eit så positivt møte som ein kunne håpe på. Under synfaringa understreka ho at Kastet-Stoadalen er viktig for naeringslivet i Lunde, men at det ikkje har vore noko lett sak for lokalpolitikarane å vedta bompengar.
– Spenninga no knyter seg til handsaminga i fylkestinget, seier Bjørg Tveito Lundefaret.
▶ Halvor Ulvenes