Lannavegen nok ein gong
I fleire år trudde mange av oss at nå blir det endeleg ny veg Kaste-Stoadalen, og vi trudde at det endeleg også ville bli investert i trygge forhold for mjuke trafikantar langs Lannavegen.
Og det var god grunn til å vere optimistisk: Både Nome kommune og Telemark fylkeskommune hadde bevilga pengar til ny veg. Bomveg rektig nok, men likevel. Men vi hadde ikkje regna med ei fotnote som i følge «Kanalen» medfører at ein manglar 140 millionar kroner på finansiering av vegen. Så nå er det «på’an igjen».
Eg forstår godt ordførar Bjørg Tveito Lundefaret som undrar seg på at Vegmyndighetane bruka 2,5 år på å oppdage denne fotnota, som dei sjøl hadde skrivi. Det er like utruleg at denne store differansen ikkje kom fram på folkemøter som blei arrangert.
Kva nå? Ja, sei det. Eg forstår i alle fall at det ikkje er lett å vere verken kommunepolitiker eller fylkespolitiker for å skaffe fram eit 100-tals millionar til.
Ein ting er sikkert, Lannavegen har vori på det politiske kartet frå 1970-talet. Det er rundt 50 år det. I dei fleste av desse 50 åra var dette ein statleg finansiert veg. Nå er som kjent vegen ein fylkesveg, men det er rimeleg i dette spesielle tilfellet at Staten hjelper til med finansiering av «fotnota». Det bør vere ett av krava som nå blir stilt. Sikkert ikkje lett å få i gjennom, men likevel.
Ein annan ting som er sikkert, er at å la dagens trafikk gå langs dagens trase, ikkje er framtidsretta. Å la ein sterkt trafikkert fylkesveg gå gjennom et boligfelt, kan aldri bli ein suksess. I alle fall ikkje for dei som bur der. Det blir dårleg trafikksikkerhet og miljø av det. Med ny bomfinansiert veg mellom Ulefoss, Gvarv og Bø, vil det garantert bli stor lekkasje av trafikk som vil unngå bompenger ved å køyre Lannavegen. Dersom ingenting blir gjort raskt, vil ulempene for ungar og andre som bur her bli endå større. Det er derfor viktig for politikarene å få i stand raske tiltak for å hindre denne lekkasjen via Lannavegen. Dette kunne eg ikkje sjå var tatt opp i brevet frå formannskapet til vegmyndighetane.
Uansett kva som skjer, må vegmyndighetane raskt kome på banen med raske trafikksikkerhetstiltak langs Lannavegen for gåande og syklande. Det blei for nokre år sidan bevilga 12 millionar kroner til trafikksikkerhetstiltak for mjuka trafikantar her, men som ikkje blei bruka. Tilsvarande midlar må raskt inn igjen, fordi uansett kva som skjer, vil det ta tid før vi får den optimale løysinga for mjuke trafikantar på denne vegen. Ein veg som opprinneleg blei bygd som ein hesteveg.
Gunnar Sanden