Tok heile overskotet
Eigarane tok heile overskotet til utbytte i det interkommunale selskapet der sjefen tener meir enn statsministeren.
▶ Det interkommunale selskapet Midt-Telemark Energi AS (MTE) fekk kraftig resultatnedgang - overskotet fall frå 16,2 millionar kroner etter skatt til rett i underkant av ti millionar kroner i fjor.
Driftsinntektene på 143 millionar kroner var på line med året før.
– Nedgangen i resultatet skuldast i all hovudsak rammene frå NVE. Overskotet vårt vart høgare enn budsjettert fordi me var heldige med kraftomsetninga, seier administrerande direktør Jon Arne Mørch Jonassen til Varden.
Han peikar elles på at dei selskapa Bø Fjernvarme og MidtTelemark Breiband, der MTE er medeigar, går svaert bra.
Ville ha meir
MTE er eigd slik: Nome kommune 40 prosent, Bø kommune 36 prosent og Sauherad kommune 24 prosent. Eigarane bad før jul om eit utbytte på 12,5 millionar kroner, men styret sa nei og delte ut heile overskotet på naer ti millionar.
– Me er ikkje heilt fornøgd, men det går bra. Kommunen hadde budsjettert med kring ein million kroner meir i utbytte frå MTE, seier Nome-ordførar Bjørg Tveito Lundefaret.
Bø-ordførar Olav Kasland seier at det er inga problem å dele ut heile overskotet fordi MTE er botnsolid.
Meir enn statsministeren
Administrerande direktør Jon Arne Mørch Jonassen tente i fjor 1.667.000 kroner pluss anna godtgjering på 199.000 kroner. Erna Solberg si årslønn i 2017 var 1.631.346 kroner.
– Kva gjer deg fortent til å tene meir enn statsministeren, Mørch Jonassen?
– Enkelt å svare på. Lønna er fastsett ut frå ein bransjestandard basert på kva selskapa driv med. Eg ligg på snittet eller litt under i bransjen. Vidare gjekk lønna mi opp etter at eg også overtok som dagleg leiar for både Midt-Telemark Kraft og Norsjøkraft. Det medførte meir arbeid, så det er rettferdig. Desse selskapa hadde tidlegare eigne daglege leiarar med lønn. Men eg er fornøgd med lønna mi - Den er bra, seier adm. direktør Jon Arne Mørch Jonas- sen i Midt-telemark Energi.