Drama under kåringa på lensmannsgarden
Den eine dommaren truga med å setje opp eigen pokal da han ikkje fekk viljen sin.
Det var stort drama under den fyrste kappleiken i landet, som vart arrangert på lensmannsgarden Grivi i Bø for 130 år sidan.
– Gregar Nordbø, initiativtakar og ein av dommarane, var ein ihuga tilhengar av Myllargutspelet som Halvor Flatland representerte. Men Fykerud vann og da sa Nordbø at han ville gje Halvor Flatland ein like fin pokal som Fykerud. Det skjedde likevel ikkje, seier forfattar Asbjørn Storesund.
For tida lagar han ei ny bok om folkemusikk, med tittelen «Bøheringsspel». Frå tidlegare har Storesund skrive det store verket om Torkjell Haugerud «Høyrer du Tårån?» og ei eiga bok om nettopp Flatland-spelet.
Smekk fullt
Det var høgsommar og strålande vêr da folk kom til garden Grivi sundag 8. juli 1888, for å få med seg den aller fyrste kappleiken i landet. Den gamle tingstova der tok kring 200 menneske, men det kom eit halvt hundre, så arrangementet måtte gå utandørs på eigedomen som ligg rett ved Bø skule.
Bakteppet for arrangementet var diskusjonen om kva som var det beste spelet - tradisjonen etter Myllarguten som bøheringen Halvor Flatland representerte, eller konsertspelet til Lars Fykerud.
Flatland var mest åleine om Myllargutspelet i Bø, etter at broren, Vesle-Hans Flatland, hadde utvandra til Amerika i 1870. Ein annan framifrå utøvar av dette spelet, Halvor J. Lie, hadde utvandra i 1884.
Tilpassa spelet
I 1880-åra var det ei blomstringstid for felekonsertar. Lars Fykerud reiste rundt i byane. For å samle publikum tilpassa han tonane til byborgarane.
– Han brukte gamle folketonar og endra elles slåttar til sin eigen stil. Fykerud endra på det meste for folk i byane likte ikkje Myllarspelet, seier Storesund.
I Bø var det to fløyer. Storbonden Halvor Borgen på Borgja var ein stor tilhengar av Fykerudspelet, medan brørne Gregar Nordbø og Erik Nordbø meinte at speltradisjonen etter Myllarguten var i saerklasse best.
Tok initiativet
For å få avgjort dette ein gong for alle, planla laerarane Gregar Nordbø og Olav J. Stadskleiv ei tevling. Ein sundag sist i mai 1888 drog Nordbø over til kollegaen sin. Få dagar seinare stod det ein annonse i Varden, datert 5. juni 1888, med overskrifta «Hardangerspil». Der inviterte Olav J. Stadskleiv, Gregar O. Nordbø, H. Halvorsen, Halvor Sønstebø og Nils G. Grivi til kappestrid.
Målet med tevlinga var at no skulle ein få «avgjort hvem som er den bedste spillemanden, saa slap de at gaa her og trykke på hinanden; for nu vil enhver vaere den bedste».
Dommarane
Utøvarane spela fem slåttar kvar - og kravet var at alle måtte ha med springaren «Nordfjordingen» i repertoaret.
Totalt melde det seg åtte deltakarar - i tillegg til Flatland og Fykerud svinga Lars Lofthus (kalla Lars Målar), Olav Bakkene, Olav Flatland, Erik Øverland, Anund Lia og Gregar Kåsene bogen på den flotte julidagen.
Dommarane var Erik og Gregar Nordbø frå Bø, sistnemnde organist. Andre dommarar var kyrkjesongar Halvor Sørensen, Lunde, lensmann Knudsen, Seljord og organist Bredo Johnsen frå Skien. Det var meininga at byfut Livius Smith frå Brevik òg skulle vore dommar, men han kunne ikkje kome den dagen.
Vanskeleg kåring
Det var mykje godt spel, og kåringa var vanskeleg. Nordbø-brørne ville båe ha Halvor Flatland på topp, medan Johnsen og Sørensen ville ha Fykerud på fyrsteplass. Lensmann Knudsen meinte at Erik Øverland frå Seljordvar best.
Ved endeleg votering blei Lars Fykerud kåra til bestemann - og fekk pokal til 20 kroner. Halvor Flatland på andre tok imot pokal til 16 kroner medan Erik Øverland som tredjemann fekk tre skeier til ein verdi av tolv kroner. Gregar Kåsene på fjerdeplass fekk to skeier til 10 kroner og den sist premierte Olav H. Flatland fekk ei skei til åtte kroner.
Gregar Nordbø gjorde notat ved dommarbordet. Desse var neppe meint for offentleggjering, men sonen Olav publiserte desse vurderingane i 1942. Der skreiv Gregar Nordbø negativt om Lars Fykerud. Framføringa hans av «Nordfjordingen får slik attest: «Urein i dobbelttonene, også for mykje gnag. Spela han opp i kraft.» Fykerud-slåtten «Budeiens lokketoner» fekk derimot 1,5 og karakteristikken «prima» av Gregar Nordbø. Hans karakteristikkar nytta ikkje - Fykerud gjekk til topps. Utøvarane lenger nede på lista framførte korte danseslåttar. Desse nådde ikkje opp.
Suveren utøvar
– Lars Fykerud må truleg ha vore ein fenomenal utøvar. Han var ein slags hardingfelas Ole Bull. Spelteknikken til Halvor Flatland kunne ikkje måle seg med Fykerud’n.
Lars Fykerud trefte Vesle Hans Flatland i Amerika. Bror til Lars, Vesle-Hans Fykerud, var med og skal seinare ha sagt: «Da Lars spela med VesleHans Flatland i Amerika, da fekk Lars hendene fulle!», fortel Asbjørn Storesund. KJELDER: Spel og dans, Bø Trykk 1988 Asbjørn Storesund: Flatland-spelet - arven etter Myllarguten. Bø Museum 2012