Delikat leigeavtale kan bli advokatmat

Den omstridde leigeavtala som Irmat har inngått for ny avfallsstasjon på Gvarv kan bli advokatmat.

Som tidlegare fortalt i Varden, har Telemark kommunerevisjon kome med kritikk av bodrunden. Der var det interkommunale selskapet Irmat var med på å drive opp kjøpesummen på tomta – og dermed leigeprisen. Leiga som Irmat skal betale er 15 gonger høgare enn i ei privat avtale på naboområdet.

Juridisk vurdering

Etter revisjonsrapporten har kontrollutvala i eigarkommunane handsama saka. Kontrollutvalet i Bø ber sin kommune sørge for at det blir stilt tilstrekkeleg med ressursar til disposisjon for å gjere nødvendige juridiske vurderinger av forholdet rundt bodrunden før tomtekjøpet.

Kommunerevisjonen skriv følgjande om bodrunden: «I forbindelse med budrunden spilte IRMAT v/styreleder, nestleder og daglig leder en aktiv rolle, og gav aksept for at budgiver kunne gi høyere bud enn det en på forhånd hadde antatt ville vaere prisen. Etter vår vurdering var dette samspillet med en potensiell utleier uheldig. I stedet for at Irmat sørget for å få forretningsmessig gode betingelser, bidro prosessen til å øke kjøpesummen og dermed leieprisen for Irmat.»

Til botn

Leiar av kontrollutvalet i Bø kommune, Arne Storhaug, seier i ein kommentar til Varden at det er viktig å kome til botn i denne saka.

– Eg er veldig overraska over det som skjedde med bodrunden og har aldri vore borti noko liknande. Her vil det vere heilt nødvendig å få ein gjennomgang av uhilda juridiske ekspertar. Ei slik sak må ikkje flyte. Ein gjennomgang er nødvendig av omsyn til alle partar, seier Storhaug.

– Må alle eigarkommunane vere samde i ein slik juridisk gjennomgang?

– Bø kommune kan formelt koste dette sjølv dersom ein finn det nødvendig, svarar Arne Storhaug, som var ordførar i Bø i 16 år.

Naturleg innstilling

Noverande ordførar i Bø, Olav Kasland (V), seier at han vil følgje tilrådinga frå kontrollutvalet. Ordføraren reknar med at kommunestyret vil slutte seg til innstillinga og stille midlar til rådvelde.

– Så blir dette vidare ei sak mellom eigarkommunane. Bø har ikkje fleirtal åleine, seier Olav Kasland.

Styreleiar i Irmat, Helge Granlund, ønskjer ikkje å kommentere vedtaket i Bø kontrollutval.

Granlund seier at Irmat tek revisjonsrapporten på alvor.