Ap-toppar meiner staten bør bla opp
Distriktsutvalet i Arbeidarpartiet meiner at staten bør bla opp slik at alle får gratis tilgang til internett.
– I Telemark finst det knapt ein einaste kommune der alle husstandane har tilgang til internett. Slik tilgang er ein føresetnad for levande bygder. Dette må bli ein rett på line med elektrisk straum, seier Nome-ordførar Bjørg Tveito Lundefaret til Varden. Ho har vore eitt av medlemmene i utvalet som er sett ned av sentralstyret i Arbeidarpartiet, der ho representerte Telemark. Ho er også oppteke av at staten må sørgje for full mobildekning, og viser til at Helgen i Nome er eitt av område med store mobilproblem.
– I dette området er det heller ikkje mobildekning nokre kilometer langs riksveg 36, seier Tveito Lundefaret.
Kostar 15 millionar kroner
Ho presenterte utvalet sitt arbeid for media i Kviteseid tysdag saman med bygdas ordførar Tarjei Gjelstad og hans kollega Erik Skjervagen frå Fyresdal. Dei viser til at i byane så har 90 prosent tilgang til internett - i distrikta er tala 43-44 prosent, eller under det halve.
Ap-toppane legg vidare vekt på at ved vidare utbygging av velferdstilbod, med nye teknologiske løysingar, er ein heilt avhengig av godt internett.
– I Fyresdal er det stort sett tilgang til breiband berre i sentrum av kommunen. Full utbygging til alle dei kring 600 husstandane vil koste 15 millionar kroner. Om staten ikkje trår til, vil Fyresdal kommune programfeste full tilgang for alle i neste periode, seier ordførar Erik Skjervagen.
Ap-toppane viser til framlegget om redusert postombering, som er planlagt frå 1. januar 2020.
– Me har godt håp om at KrF kan vere med å stoppe dette i Stortinget. Framlegget er totalt uakseptabelt så lenge ikkje alle har tilgang til nettet, seier dei tre ordførarane.
Desentralisert utdanning
Tveito Lundefaret understrekar elles at distriktsutvalet er oppteke av å behalde kompetent arbeidskraft i distrikta.
– Kommunane får velta over seg stadig større omsorgsoppgåver frå sjukehusa. Desentralisert utdanning er viktig for å sikre gode tenester, seier Tveito Lundefaret.
Saman med kollegaene er ho svaert kritisk til sentraliseringa som skjer med den noverande regjeringa.
Dei vil også ha betre tilgang på kapital for bedrifter som vil satse i distrikta.
– Veldig mykje av verdiane blir skapt i distrikta, og me ønskjer at lokalsamfunna skal bli sitjande igjen med meir av gevinsten. Lik nettleige over heile landet er eitt av krava til distriktsutvalet. I dag opplever ein høgare nettleige for husstandar som ligg rett ved kraftverka enn det som er prisen i byane, seier dei tre ordførarane.