Opprør mot bru-stenging
Hengebrua ved Tjønntveit i Øvre Bø er stengt for all ferdsel. Det skaper kraftige reaksjonar i bygda.
Salen i ungdomshuset Friheim blei fullsett på det spontane møtet måndag kveld. Bakgrunnen for stenginga er at brua er i dårleg stand, og kommuneleiinga tør ikkje lenger ta ansvar for ferdselen. No vil innbyggjarane at politikarane løyver nødvendige midlar til opprusting - som er kalkulert til kring tre millionar kroner pluss moms.
Kraftige reaksjonar
– Det har kome kraftige reaksjonar på stenginga, og det er ikkje rart, sa Amund Johnsrud som representerer grendelaget i Øvre Bø.
– Me vil ha bilbru som tidlegare. Det er berre det som gjeld, sa Einar Brekke og fekk salen med seg. Han blei medlem i arbeidsgruppa. Planen no er å lage ein interpellasjon til neste kommunestyremøte, der det blir samla inn underskrifter.
– Eg trur brua er blitt meir bruka enn folk er klar over, sa Hans Ole Saetra Erikstein i ordskiftet.
Deler bygda på langs
Grete Skoe peika på at med stenging av brua deler ein bygda på langs.
– Stenginga tek mykje livskvalitet frå oss, sa ho. Gro Birgitte Røiland synest stenginga er absurd etter at tre grendelag i sommar gjekk saman om å ruste opp badeplassen.
– Stenginga er takka frå kommunen, sa ho. På møtet kom det framlegg om både kronerulling og dugnad, for å få realisert prosjektet. Den nedsette arbeidsgruppa skal sjå naermare på desse spørsmåla. Vidare er det venta at stor mobilisering frå denne delen av bygda når kommunestyret skal banke budsjettet for 2019 måndag 10. desember.