Blankt nei til reservasjon
Eit samla kommunestyre i Bø sa blankt nei til å tilsetje ein lege som reserverer seg mot å setje inn spiral.
– Eg er glad for samrøystes vedtak, seier ordførar Borgar Kaasa (Sp) etter at alle dei 25 kommunestyrerepresentantane sa nei til lege med reservasjonsrett.
Litt umusikalsk
Mange hadde ordet i debatten, der Karin Hagen (Ap) og Olav Kasland (V) var mest aktive mot å tilsetje ein lege med reservasjonsrett.
– Politikarane synest ein slik reservasjonsrett er litt umusikalsk i 2018. Meldinga er klar om at ein slik praksis er uaktuell i Bø, legg ordføraren til. Avgjerda var stikk i strid med innstillinga frå rådmann Åse Egeland, som sa ja til ei slik tilsetjing.
Egeland, som også er rådmann i Sauherad, seier at saka i utgangspunktet var ei prinsippsak, men at i realiteten handla den om legen Katarzyna Jachimowicz. Ho fekk sparken av Sauherad kommune fordi ho ikkje vil setje inn spiral på kvinner. Høgsterett sa i haust at oppseiinga er ugyldig.
– Sauherad har ingen fastlegeheimel, men det har Bø. Vedtaket er greitt og det var viktig å teste saka, seier rådmann Åse Egeland, som tek avgjerda til etterretning.
Har betalt 3,4 millionar
Ho opplyser at Sauherad så langt har betalt ut 3,4 millionar kroner – 2,5 mill. kroner i sakskostnader til legen og 800.000–900.000 kroner i eigne kostnader.
–Høgsterett seier også at legen skal ha ei erstatning. Eg reknar med at staten vil refunderer desse utgiftene, seier rådmann Åse Egeland. Ho ville ha saka drøfta på bakgrunn av at Bø og Sauherad blir til Midt-Telemark kommune 1. januar2020.
Ikkje urimeleg
Høgsterett sa i dommen tidlegare i haust at det er høve til reservasjon, så sant det ikkje vert urimeleg, vanskeleg eller umogeleg for ei kvinne å få sett inn spiral.
I saksutgreiinga skreiv Egeland at om kommunestyret godkjenner ein slik reservasjon, måtte ein løyse oppgåva gjennom ei avtale med dei andre legane på kontoret. Rådmannen skriv òg at nei til reservasjon, kan få betyding for erstatningsansvaret til Sauherad kommune og påverke økonomien i ny kommune.