– Sparar seg til fant
Bebuarar frå Øvre Bø synest det er for dårleg at hengebrua i fyrste omgang berre blir g/s-veg.
Som tidlegare fortalt i Varden, vart brua stengt tidlegare i haust, etter at eksterne konsulentar hadde sjekka tilstanden. Dei meinte den måtte stengast for alle av omsyn til tryggleiken. Fram til seinhausten var hengebrua over Bøelva også open for bilistar.
Ikkje fornøgde
– Me er ikkje fornøgde. Det er for kleint med berre gangbru. Me meiner at kommunen kan spare seg til fant med å starte med g/s-veg over elva, seier Anne Grov og resten av bebuarane som møtte fram da kommunestyret handsama saka måndag kveld.
Politikarane løyver 500.000 kroner, slik at folk kan gå og sykle over brua. Teknisk sjef Vidar Lofthus opplyste til kommunestyret at den skal bli klar til dette før sommarsesongen. I eit verbalt framlegg ber eit samrøystes kommunestyre om at rådmannen jobbar vidare for oppgradering av hengebrua til bilstandard. Dette skal skje i dialog med innbyggjarane i området. Kommunestyret ber òg om vedlikehaldsbehovet for andre bruer i bygda.
Må bytte konstruksjon
Bebuarane i Øvre Bø viser til at konstruksjonen på hengebrua må skiftast. Derfor meiner dei det vil bli billegare for kommunen å ta alt på ein gong.
– Me synest politikarane er litt tafatte. Eigentleg trur me ikkje at brua blir opna for biltrafikk igjen. Tidlegare var den også open for traktorar, seier Anne Grov og dei andre innbyggjarane som reiste skuffa heim frå kommunestyresalen.
Beklaga dårleg vedlikehald
I ordskiftet i kommunestyret beklaga Rønnaug Woxen Thoen (Sp) at kommunen har hatt dårleg vedlikehald på hengebrua. Ho vil jobbe for at den framleis skal vere bilbru. Øyvind Erikstein (KrF) gler seg over det store engasjementet lokalt.
– Det står ikkje på den politiske viljen. Her gjeld det også å ta vare på utkantane, og ikkje berre sentrum. Brua er ei viktig ferdselsåre mellom sørsida og nordsida av Bøelva, sa han. Geir Sønstebø (V) understreka at dei økonomiske realitetane ikkje har gjort det mogleg med betre vedlikehald.
– Bø var på Robek-lista inntil for eit par år sidan, sa Geir Sønstebø.