Klar tale frå grasrota om samanslåing
Are Saeland meiner at krangelen om lokalisering av tenester i den nye kommunen skuldast dårleg politisk handverk.
Som nemnd i Varden tysdag, er det full politisk strid om lokalisering av tenester i nye Midt-Telemark kommune. Den er eit resultat av at Bø og Sauherad slår saman frå komande årsskifte.
Ordførar Mette Haugholt kalla kollegaen i Bø og hans støttespelarar for feige, sidan dei ikkje ville investere 27 millionar i nytt kommunehus på Akkerhaugen.
– Det gjekk som eg frykta. Her er det ikkje gjort skikkeleg økonomiske kalkylar over kva det vil koste å bruke dei ulike kommunale bygga. Etter mitt syn er dette dårleg politisk handverk frå A til Å. Kommunen er i tillegg altfor administrasjonsstyrt, seier den fritalande bøheringen Are Saeland.
Kunne droppa
Han er ein av fleire som kvar morgon samlar seg rundt bordet på bensinstasjonen ESSO for å diskutere det som skjer i lokalsamfunnet.
Saeland seier at politikarane like godt kunne droppe folkerøystinga, for han meiner at saka om ny kommune var avgjort på førehand.
– Eg har også gjort meg mine tankar om kvifor det blei ordførarskifte i Bø sist haust og Olav Kasland drog til Oslo. Politikarane køyrde veldig hardt for å få til samanslåing, legg han til.
Burde høyrt på ekspertane
Saeland viser til at det ikkje mangla på åtvaringar frå økonomisk hald før folkerøystinga.
– Kjetil Lie på Telemarksforsking gjekk tidleg ut og åtvara mot økonomiske gevinstar. Ved samanslåing må ein få ned kostnadene. Når administrasjonen ikkje blir slanka, så blir dette feil. Ein så liten kommune har to rådmenn – kor mange andre har på same storleik råd til dette, spør Saeland som heller ikkje har gløymt lønnstillegga på opp til 200.000 kroner for toppane i Bø kommune hausten 2017.
– Kva seier folk i bygda elles om samanslåinga?
– I det miljøet eg vankar er eg representativ for synet. Eg høyrer også mange andre som er veldig negative til samanslåinga, svarar Are Saeland.
Tredd nedover hovudet
Jarle Halvorsen er òg innom Esso denne føremiddagen.
– Eg sat i Sauherad kommunestyre, og dette blei berre tredd ned over hovudet på oss. I visse kommunar kan det nok vere ein fordel med samanslåing, men ikkje her, seier Jarle Halvorsen.