Omsette for 168 millionar
Helge Byggland og Bjørn Tore Andersen starta eiga bedrift i 2011. I fjor omsette selskapet deira for 168 millionar kroner.
Morgedal Entreprenør AS blei starta i 2011, og har etter det økt inntekta år for år. I 2018 omsette bedrifta for 168 millionar.
Morgedølane hadde arbeidd i anleggsbransjen i fleire år. Draumen om eiga bedrift hadde vore der ei god stund, og for åtte år sidan vart den realisert ved etableringa av Morgedal Entreprenør AS.
Karane, som var likestilte eigarar, byrja med brøyting samt mindre tomte - og vegarbeid. Starten blei god. I etableringsåret 2011 omsette Morgedal Entreprenør for 5,4 millionar kroner, og overskotet før skatt blei på 1,4 millionar kroner. Utviklinga har vore rivande - året etter var inntektene dobla, og i 2013 var veksten frå føregåande år på meir enn 100 prosent - til 21,8 millionar kroner.
Tre år seinare, i 2016, hadde driftsinntektene auka til 53,4 millionar kroner. Da var talet på tilsette kome opp i 20, og selskapet hadde oppdrag i den sentrale delen av Austlandet inn mot Oslo. Til dømes var arbeid med veg, vatn og avløp i Enebakk og Nittedal nokre av oppdraga. Offentlege aktørar som til dømes kommunar og vegvesen - har heile tida vore dei viktigaste kundane.
I løpet av denne vekstfasen skaffa Morgedal Entreprenør seg òg eigen verkstad i Seljord.
Ny partnar
I 2017 skulle det skje endringar i firmaet. Rune Landsverk frå Kviteseid, som hadde kjent Andersen og Byggland frå barneåra, kjøpte seg inn som likestilt aksjonaer (33 prosent), med verknad frå 1. januar 2017. Han vart både dagleg leiar og styreleiar. Landsverk hadde jobba i NCC, og vurderte saman med ein kollega å starte for seg sjølv. I staden etablerte dei eit anleggsfirma saman med Skorvegruppen, men usemje om vegen vidare gjorde at båe to slutta hausten 2016. Landsverk blei spurt om å gå inn i Morgedal Entreprenør. Etter fleire møte vart forretningsmodellen spikra. Dette resulterte i Morgedalgruppen som forutan Morgedal Entreprenør omfattar aksjeselskapa Morgedal Eigedom, Vest-Telemark Pukkverk og Vest-Telemark Drift.
Kraftig auke
Ved inngangen til 2017 utgjorde ordrereserven elleve millionar kroner. I løpet av dette året auka den til heile 340 millionar kroner. Morgedal Entreprenør omsette for 134 millionar i 2017, og fekk eit resultat før skatt på solide 7,5 millionar kroner.
– Rekneskapen for 2018 er ikkje endeleg avslutta, men det blei overskot også i fjor. Driftsinntektene for gruppa utgjorde i fjor 168 millionar kroner, seier dei tre eigarane. Dei legg til at i 2019 blir det ei konsolidering, før ytterlegare vekst. Selskapet har no 50 tilsette, men på det meste - med innleige av arbeidskraft - har 120 personar jobba for firmaet.
Eit av dei store prosjekta i dag er bygging av ny trase på E134 mellom Morgedal og Høydalsmo. Vegen på 9,4 kilometer - til 140 millionar kroner - skal stå ferdig til hausten. Morgedal Entreprenør har vidare hatt alt grunnarbeidet med omlegginga av riksveg 36 frå Skjelbredstrand til Geiteryggen i Skien. For tida reknar dei på fleire prosjekt både i og utanfor Telemark.
Vil tilsette fleire
No ønskjer selskapet å styrkje administrasjonen for å utvikle selskapet vidare. Morgedalgruppen er derfor på jakt etter fleire nye kollegaer.
– Målet vårt er å auke omsetninga, og skape interessante arbeidsplassar i naerleiken av heimane våre, seier eigarane som i fjor flytta hovudkontoret til Kviteseid.
– Mørke skyer på horisonten? – Me har ein god arbeidsstokk, og målet er å få tak i fleire like flinke folk. Me må derfor vere minst like attraktive som konkurrentane, seier Bjørn Tore Andersen, Helge Byggland og Rune Landsverk.