Stor gard på handel
Slektsgarden Spockeli i Fyresdal er på handel. Ifølgje ei skriftleg kjelde har garden vore i slekta sidan 1550.
Eigedomen er no annonsert på nettstaden Finn for 5,5 millionar kroner. Dagens eigar er Eivind Spockeli.
Eigedomen ligg i Spockeligrend, 390 meter over havet, nord i kommunen. Vegen til Fjellgardane deler tunet.
Tradisjonar i 470 år
Ifølgje boka «Norske Gardsbruk» skal Spockeli søndre vore i slekta sidan 1550. Der heiter det vidare at stabburet på garden er frå 1618 - eller temmeleg nøyaktig 400 år. På 1600-talet blei garden kalla «Spagelydt». Gardstunet består av våningshus, eldhus, stabbur og eit stort uthus. Våningshuset har eit bruksareal på 232 kvadratmeter. Før ein kjem til garden ligg det ei gamal smie/badstove. Fram til 1960 var det mjølkeproduksjon på eigedomen.
Seter og jakt
Til garden høyrer setra Buiene som ligg 730 meter over havet. Dette er 15 kilometer frå driftssenteret. Eigedomen består av to hovudteigar. Den største teigen på 4.955 dekar ligg for ein stor del over verneskoggrensa mot kommunegrensa til Tokke. Ein mindre teig på 1.777 dekar ligg rundt eigedomen Spockeli.
Det kan jaktast både elg, hjort, rådyr, reinsdyr og småvilt på eigedomen, heiter det i salsoppgåva.
Ifølge «Norske Gardsbruk» er dyrka areal på 85 dekar og det produktive skogarealet på 2.700 dekar. Vidare er det 5.000 dekar med hei og utmark.
Taus om salet
Eigedomsmeklar Lars Erik Greivstad i Privatmegleren, som står for salet av den tradisjonsrike garden, ønskjer ikkje å kommentere noko om bakgrunnen for at den store eigedomen no er på handel.
Ifølgje salsoppgåva er det odel på eigedomen, men alle kjende odelshavarar har skrive frå seg denne retten.
I tråd med konsesjonslova er det også buplikt på garden.