Ville kaste styretopp
Irmat-saka skapte temperatur i Bø kommunestyre. Eit mindretal ville både kaste styreleiaren og melde saka til politiet.
▶ Bakgrunnen er rapporten frå Telemark kommunerevisjon, som Varden omtala i laurdagsavisa. Rapporten blei bestilla av kommunestyret, og fleirtalet på 17 medlemmer tok rapporten til vitande.
Ikkje tillit
Mindretalet på åtte - Ap og Frp – støtta eit framlegg frå Glenn Isaksen (Ap) i fire punkt. Mindretalet har ikkje tillit til styreleiar i Irmat, Helge Granlund. Dei ville også melde selskapet Irmat til politiet, etter mistanke om straffbare forhold på grunn av det som er omtalt i rapporten frå kommunerevisjonen.
Mindretalet forventar og at det blir teke laerdom av rapporten, og at kommunen legg til rette for betre eigarstyring. Representantane frå Ap og Frp ber også om at rådmannen skal endre praksis, og sørge for trygg kontroll med at grunnlaget for selskapet sine sjølvkostkalkylar er korrekte.
Skremmande
Glenn Isaksen sa at posisjonen ufarleggjer og bagatelliserer Irmat-rapporten frå Telemark kommunerevisjon.
– Det er skremmande at posisjonen gjev styreleiaren i Irmat ny tillit. Dei let att augo for det som har skjedd, sa Glenn Isaksen. han sa også at det er minimalt med behov for den nye stasjonen på grensa mellom Bø og Sauherad. Geir Sønstebø (uavh.) sa at det er for seint å melde saka til politiet. Han viset til at vitne alt har uttalt seg til revisjonen. Augon Eika (V) sa at selskapet no treng ro. det vart og peika på at Helge Granlund tok protokolltilførsel på den omstridde leigeavtala. Glenn Isaksen sa at det skjedde tre månader etter at vedtaket blei fatta.
Heile styret
Ole Morten Aasgrav (Frp) støtta Ap, og la til:
– Eg vil spisse det ytterlegare, og gjere framlegg om å kaste heile styret, sa Ole Morten Aasgrav som og understreka at rådmann Åse Egeland skriv frå seg ansvar i saka. Det avviste ho, og viste til at dette er eit aksjeselskap og ikkje noko som involverer rådmannen.
Styreleiar Helge Granlund ønskjer ikkje å kommentere framlegget frå mindretalet. Frå talarstolen beklaga han derimot at selskapet har kjøpt konsulenttenester for millionbeløp utan konkurranse.
▶ Halvor Ulvenes