Så mange kom
Totalt besøkte 87.006 personar årets dyrsku i Seljord.
Det er vel 7.000 under rekorden frå 2016 da 94.248 var innanfor portane på fesjåplassen i Seljord. Rekorden blei sett det året da fesjået feira 150-årsjubileum, med kronprinsparet som gjester på opningsdagen.
I år var besøket slik: fredag 29.100, laurdag 35.855 og sundag 22.051 personar. Dagsrekorden på vel 41.000 personar vart sett på dyrskulaurdagen i fjor.
Veldig godt fornøgd
Dagleg leiar i Dyrsku`n Arrangement, Geir Helge Espedalen, seier i ein kommentar til Varden at han er veldig godt fornøgd med årets besøk.
– Dette blei bra. Det er mange fornøgde utstillarar og publikum. Me har hatt ein solid dyrsku.
Godt samarbeid
Espedalen trekker fram at arrangementet har glidd svaert bra. Han viser til at dei har jobba for å betre logistikken, og trekker her fram kontakten med grunneigarar, raudekrossen og politiet.
Dyrsku-sjefen trekker også fram den enorme dugnadsinnsatsen. Kring 3.000 friviljuge er i sving for å få gjennomført den største landbruks- og handelsmessa i landet. Han nemner òg representantar for aktive lag og organisasjonar.
– Det er imponerande å få til eit slikt arrangement i ei bygd med under 3.000 innbyggjarar, seier geir helge Espedalen.
Flinke kokkar
Det har vore eit yrande liv på fesjåplassen som i år hadde heile 806 utstillarar. I Seljord får ein tak i det meste i løpet av desse tre dagane - frå det minste jugl til store anleggsmaskiner.
Det er ei rad kurs og aktivitetar, utanom den tradisjonelle utstillinga. Deriblant kan nemnast matkurs for barn i alderen 4-14 år.
Smårollingane storkoste seg på kurset.
– Gøy med matkurs, seier vesle Kristin på fire somrar frå dyrskubygda Seljord.