Ettervernet må styrkast
Notodden kommune har aukande utfordringar innanfor rusomsorga.
Tidlegare hadde kommunen ein SLT-koordinator. Denne stillinga er nå borte. Ruskonsulentane i kommunen hadde før kapasitet til å drive oppsøkjande verksemd. Dette har dei ikkje lenger kapasitet til. Det er eit relativt godt tilbod av sjølvhjelpsgrupper i kommunen. R.O.T (Recovery og Tilfriskning), A-larm og NA (Anonyme Narkomane). Dette gjer at det er eit tilbod om brukarstyrt samtaletilbod 5 kveldar i veka. Desse møta er for både rusavhengige og pårørande. Du kan komme sjølv om du er i aktiv rus, men det er er ikkje tillat å vera «rusa» på møta.
Kirkens Bymisjon er starta, og NFK gatelag starta opp for snart eit år sidan. Dette er viktige møteplassar for folk som har ulike rus- eller psykiske utfordringar. Dette er tilbod på dagtid. Det syner seg dessverre at det er ganske få som nyttar seg av desse tilboda. Utfordringa er korleis me kan få fleire til å bruke desse, for å få ein betre kvardag, eller aller helst verta rusfrie. For kvar rusavhengig er det 7-8 pårørande som vert påverka av rusbruken. I Grenland kan personar, som er i behandling på Borgestadklinikken, delta i sjølvhjelpsgrupper og andre aktivitetar medan dei er i behandling.
Eit kritisk tidspunkt er når «pasienten» er ferdig i behandling. Dersom ein skal unngå å få eit tilbakefall så er det viktig å ha eit sosialt nettverk rundt seg som er rusfritt. Veldig mange kjem heim og kjem raskt i kontakt med sitt gamle rusmiljø. For å unngå tilbakefall så må den enkelte ha tett oppfylging i denne perioden. Her kan ein likemann (person med tidlegare ruserfaring) vera eit viktig bidrag. Likemannen kan vera ein døråpnar inn i dei ulike rusfrie miljøa.
Kommunen må få organisert innsatsen innanfor rusomsorga på ein betre måte enn i dag. Dette kan gjerast ved å tilsette ein erfaringskonsulent og nokre likemenn, som skal jobbe tett saman med det offentlege tenestetilbodet.
Stig Bakka og Svein Arvid Tørre