Gir ikkje opp kampen
Jørn Myhre, som har krangla om tett kloakktank ved fritidsbustaden sin i Fyresdal, har kopla frå reinseanlegget, etter trugsmål om bot frå kommunen. Hytteeigaren gir likevel ikkje opp kampen.
Som Varden tidlegare har fortalt, har byggmeister Myhre etablert ein tett kloakktank på hyttetomta si i Fyresdal.
Kommunen meiner den er ulovleg, og truga han med bot på 25.000 kroner - med frist no i månadsskiftet - viss han ikkje kopla frå anlegget.
Over for godt
Hytteeigaren frå Sandefjord har følgd oppmodinga, og sende fredag følgjande helsing til kommunen:
«Rørlegger Norvald Vik har nå koblet fra vann og avløp til tett tank, slik at hytten ikke kan brukes i tråd med Fyresdal kommunes ønske . ... Da håper jeg Fyresdal kommune er fornøyd for reduksjon av varme senger fra vår side. Tradisjonen med å feire nyttår på hytta er nå over for godt.»
Myhre har skriv ei rad brev til kommunen, der han viser til krav om regulering.
Åtte månader
- Oppstartsmøtet var 29. mars i år. Eg har vore klar til å regulere sidan i vinter, men etter åtte månader har framleis kommunen ikkje kunne gje meg svar på kva eg skal regulere i eit hytteområde som blei utbygd for 30 år sidan. Dette er ei skandaløs sakshandsaming, og heilt i strid med forvaltingslova, seier Jørn Myhre.
Andre fekk lov
– Ein annan hytteeigar har fått løyve til påbygg og utslepp av gråvatn. Ei hytte nr. to fekk full installasjon av med reinseanlegg. Båe ligg i 100-metersbeltet, der det berre er lov til å vedlikehalde det ein har.
Desse hyttene har fått monaleg verdiauke som me andre ikkje får glede av. Dette er grov forskjellsbehandling. Eg gir ikkje opp kampen, men kan ikkje klage til Fylkesmannen før kommunen har handsama klaga vår, seier Jørn Myhre.
I ei brev på vegner av ein annan hytteeigar skriv Jørn Myhre at ei klage til Fylkesmannen blei liggjande fire månader i kommunehuset.
Vil bøye seg
Ordførar Erik Skjervagen seier at han er ueinig med saksframstillinga til Myhre, men ber han klage til Fylkesmannen.
– Dersom Fylkesmannen konkluderer med at Myhre har rett, så vil me bøye oss for det, seier ordføraren.
– Ei anna klage blei liggjande i fire månader i kommunen?
– Viss det er rett, har kommunen gjort for dårleg jobb, svarar Erik Skjervagen.