Andvik-magi i årets «Jol i Telemark»
Den 86. utgåva av «Jol i Telemark» er på gata. Også i år byr redaktør Ragnar Lurås på variert stoff frå ulike delar av fylket.
Det er Telemark Mållag som gjev ut bladet byr på ni artiklar, dikt, novelle og jolekryssord.
Målarprinsen
Jonny Andvik, som har illustrert omslaget, og står for den grafiske formgjevinga, har dessutan skrive ein lengre artikkel om målarprinsen Herman August Cappelen.
Han kom til verda i 1827, og vart fødd inn i ein av dei rikaste familiane i Telemark. Alt i barneåra viste han lovande takter. Da August var sju – åtte år gamal slo familien seg ned på Holden ved jernverket på Ulefoss. I artikkelen får lesarane resten av livssoga, frå han som 12-åring flytta til onkel og tante på Klosterøya i Skien. Etter utdanning på Universitetet følgde han Hans Gude og kollegaene til Düsseldorf. Talentet blei sjuk i livets vår, og døydde berre 25 år gamal.
Hardingfele og kongepokal
Stein Versto skriv om meistermøtet på Møsstrond sommaren 1935, da folkemusikarane Arne Bjørndal, Eivind Mo og Eiliv Smedal møtest. Det blei eit historisk treff med tre spelemenn.
Sportsinteresserte får sitt i jolebladet – med artikkelen av Torfinn Syftestad om Kongepokalen. Jon Hauge frå Morgedal vann den fyrste i 1879, og fram til 2003 hadde 41 slike gjaeve premiar hamna i skifylket Telemark, ifølgje Syftestad. Han legg til at talet er noko omdiskutert, men at det ikkje er store avvik i talla som blir presenterte.
Andre artiklar
Årets utgåve byr elles på ei utvandrarsoge frå Lårdal, ført i pennen av Arne T. Aabø. Åsta Østmoe Kostveit skriv om Sigrid Nordskog, jenta som ville bli kunstnar. Eivind Blikstad fortel om to lagnader i liv og treskurd, illustrert med foto av Per-Eirik Hekkelstrand. Olav Mosdøl har møtt kunstnaren Ruth Kvålo Dalen, og Tor Valle fortel om bjønnejegaren Nils Bronåsen. Kari Wingård skildrar møtet med fanten, Eldrid Lunden byr på dikt, Erland Kaasa har skrive novella medan Einar Søreide snikra saman jolekryssordet.
Kom i 1928
Jol i Telemark kom ut første gong i 1928 og har med unnatak av perioden under 2. verdskrigen, kome ut kvart år.
Jol i Telemark er det einaste julehefte i Telemark og er eit julemagasin som blir utgitt ein gong i året.