Vil kreve fleire millionar etter spiral-saka
Kommunedirektør Åse Egeland varslar erstatningskrav mot staten for påførte millionkostnader i saka om den oppsagte «spirallegen» Katarzyna Jachimowicz. Staten sitt tilbod er på to millionar kroner, men det er altfor lite for kommunen.
Legen fekk sparken av Sauherad kommune fordi ho nekta å setje inn spiral på kvinnelege pasientar. Etterpå varsla ho millionkrav mot kommunen. Det er no forhandlingar med den aktuelle legen om erstatning.
Kommunen har gjeve eit tilbod på 1,25 millionar kroner, medan motkravet er no på i underkant av tre millionar kroner. Ifølgje kommunedirektøren si utgreiing til kommunestyret er det sannsynleg at dette spørsmålet må avgjerast av domstolane.
Store kostnader
Kommunen har i tillegg hatt eigne, store utgifter i saka. Representantar for Sauherad kommune hadde i vår eit møte med statsråd Bent Høie om staten ville ta ansvar for noko av kostnadene.
På det tidspunktet hadde Sauherad kommune betalt ut over tre millionar kroner i sakskostnader. I tillegg var det den gongen varsla erstatningskrav frå den aktuelle legen mot kommunen på over tre millionar kroner. Dermed kunne kommunen få ein samla kostnad på meir enn sju millionar kroner.
Ikkje fornøgd
Helse- og omsorgsdepartementet har meldt til Sauherad-ordførar Mette Haugholt på telefon at kommunen kan søkje Fylkesmannen i Telemark om skjønsmidlar, og at kommunen i så fall vil få to millionar kroner. Vurderinga til kommunedirektør Åse
Egeland er at dette er vesentleg under det som ein hadde venta at staten ville stille opp med. Sauherad-ordføraren bad om å få tilbodet skriftleg, men det sa sa statsekretaeren i helse- og omsorgsdepartementet nei til, heiter det i saksframstillinga til kommunestyret i Midt-Telemark.
Slik er tilrådinga
Politikarane der får saka til handsaming fyrstkomande måndag. Kommunedirektøren rår kommunestyret til å gjere følgjande vedtak: «MidtTelemark kommune ber Sauherad kommune om å søkje Fylkesmannen i Telemark om skjønsmidlar til dekning av kostnader kommunen har hatt i samband med fastlegesaka, samstundes som kommunen varslar det vil bli sendt inn krav om erstatning for dei kostnadene som ikkje vert dekka av skjønsmidlar.»
Søksmål eit alternativ
Åse Egeland skriv at når Høgsterett meiner at kommunen er ansvarleg overfor fastlegen, må staten vere ansvarleg over for kommunen. Egeland har konsultert med advokat, og skriv at søksmål er eitt av fleire alternativ om staten ikkje dekkjer alle kostnadene. Ho tilrår likevel i fyrste runde kommunestyret til å søkje skjønsmidlar, samt krav om erstatning for resten av kostnadene.