Butikken med hjarte for kundane
På Åmdalsverk daglegvare står kaffien klar kvar dag klokka 10. Dei tilsette i butikken får super attest av kundane.
– Ei jolekringle bør gå til kaffikroken og dei tilsette på Åmdals Verk daglegvare. Ein liten naerbutikk med stort hjarte for kundane sine. Kaffikroken er bygdas viktigaste samlingsstad. Kringla hadde vore perfekt inntil kaffien til kundane og dei tilsette, skriv Sigrunn Skare i framlegget sitt.
Siste nytt
– Me er innom her ofte. Dei som møtte opp kvar dag er borte no, seier Stein Otto Byggstøyl, Per Pedersen, Asbjørn Rinden, Knut Urbø og Harry Frantzen i den eigne kroken som bygdefolk har rusta opp på dugnad. Her drøftar dei aktuelle tema, og får siste nytt om det som skjer.
Bygget er det gamle forsamlingshuset som stod i Juvet og som blei flytta ned til verket. Tidlegare var det fleire forretningar på Åmdals Verk, men da bygda vart utan handelstilbod tok innbyggjarane skeia i eigne hender – og oppretta i 2003 firmaet Åmdals Verk Daglegvare AS. Det skjedde etter at dei gjennom nokre år hadde måtte dra til Dalen for å gjere innkjøpa. Butikken har 80—90 aksjonaerar. Dei fleste i lokalsamfunnet er såleis medeigarar i forretninga, som ligg i rett ved krysset til fylkesvegen som går mot Dalen eller Vrådal.
Veteranen
Terje Stava er den tredje daglege leiaren i butikken sidan 2003. Oslo-mannen
har 17—18 års røynsle frå handelslivet på Dalen, og byrja i butikken 1. april i år. Med seg har han veteranen Åse Solli som òg var butikkmedarbeidar i den daglegvareforretninga som var i same bygget på 1990-talet, men som blei lagt ned. tillegg arbeider tidlegare dagleg leiar Heidi Helmersen i ei deltidsstilling.
Treng kvar krone
– Er folk på Åmdals Verk flinke til å bruke forretninga?
– Stort sett, men dei kan bli enda flinkare. Me treng kvar einaste krone, svarar Åse Solli og Terje Stava. Butikken hadde i 2018 driftsinntekter på 4,4 millionar kroner — ein liten nedgang på 13.000 kroner frå året før. Rekneskapen syner eit underskot på 99.000 kroner. Året før gjekk butikken, som sysselset kring to årsverk, med 39.000 kroner i pluss.
— Gjennom åra har det vore både pluss og minus. Me balanserer på ein knivsegg, seier Knut Urbø, styremedlem og ein av dei mange medeigarane.
Karane rundt bordet er uroa for framtidsutsiktene for det vesle lokalsamfunnet, som på det meste hadde 400 tilsette i gruvene.
– No ligg det an til at både skule og barnehage kan bli nedlagt. Skulle også butikken ryke, blir det stussleg her. Me treng å få fleire unge folk til bygda. Åmdals Verk har gode tilbod – lysløype, fotballbane, ballbinge, hoppbakke, alpintilbod og friidrettsbane.